Група ўкраінскіх вайсковых аналітыкаў паведаміла, што горад Вуглядар у Данецкай вобласьці, за які ішлі вельмі жорсткія баі з студзеня 2023 году, цалкам акупавалі расейскія войскі.
Летась у студзені ў адным з баёў у Вуглядары загінуў беларускі добраахвотнік Эдуард Лобаў.
У Генэральным штабе Ўкраіны падзеі пакуль не камэнтуюць
«Валнаваскі раён (паводле старой адміністрацыйнай сыстэмы) цалкам страцілі», — паведамілі ў аналітычнай групе DeepState.
У чарговым паведамленьні Генэральнага штабу Ўзброеных сіл Украіны інфармацыі пра апэратыўную сытуацыю каля Вуглядару няма. Паведамілі толькі пра сытуацыю на курахаўскім і ўрэмеўскім кірунках — гэта прыкладна за 30 кілямэтраў ад Вуглядару.
«На курахаўскім кірунку Сілы абароны адбілі 25 атак у раёнах сёлаў Цукурына, Гарняк, Георгіеўка, Канстанцінаўка і Кацярынаўка. На ўрэмеўскім кірунку, як удакладнена, праціўнік правёў непасьпяховую атаку нашых пазыцыяў у кірунку Богаяўленкі», — адзначаецца ў паведамленьні Генэральнага штабу Ўкраіны.
Пазьней у апэратыўна-стратэгічнай групоўцы войскаў «Хорціца» пацьвердзілі вывядзеньне украінскіх падразьдзелаў з Вуглядару.
«Вышэйшае кіраўніцтва надала дазвол на ажыцьцяўленьне манэўру вываду паздразьдзелаў з Вуглядару з мэтай захаваньня асабовага складу і баявой тэхнікі, каб заняць пазыцыю для вядзеньня далейшых дзеяньняў», — адзначаецца ў афіцыйным паведамленьні.
У групоўцы таксама дадалі, што расейцы змаглі заняць Вуглядар дзякуючы атрыманым рэзэрвам, якія атакавалі ўкраінцаў з флянгаў і такім чынам зьнясілілі ўкраінскія падразьдзелы. Каб пазьбегнуць расейскага атачэньня, украінскія падразьдзелы вывелі.
ГЛЯДЗІЦЕ ТАКСАМА:
У Кіеве праходзіць разьвітаньне зь беларускім добраахвотнікам Эдуардам Лобавым, які загінуў пад ВуглядарамАцэнкі экспэртаў
Экспэрты амэрыканскага Інстытуту вывучэньня вайны (ISW) на падставе даступных відэзапісаў прыйшлі да высновы, што расейскія войскі, хутчэй за ўсё, захапілі Вуглядар.
У справаздачы ISW адзначаецца, што частка групоўкі ўкраінскіх сілаў плянава адышла з Вуглядару, каб пазьбегнуць атачэньня.
«Маштаб украінскіх стратаў пакуль невядомы, але шырока распаўсюджаныя паведамленьні аб адступленьні ўкраінскіх войскаў сьведчаць, што большы ўкраінскі кантынгент, хутчэй за ўсё, пазьбег расейскага атачэньня, якое магло прывесьці да большых стратаў», — паведамілі экспэрты інстытуту.
У ISW нагадалі, што Расея зрабіла прынамсі дзьве вялікія спробы захапіць Вуглядар — у кастрычніку-лістападзе 2022 году і ў студзені-лютым 2023-га, у выніку якіх страціла шмат жывой сілы і вайсковай тэхнікі.
Раней ISW ацэньваў, што захоп Расеяй Вуглядару наўрад ці істотна зьменіць хаду яе наступальных апэрацыяў на захадзе Данецкай вобласьці, бо сам гэты горад ня ёсьць надта важным матэрыяльна-тэхнічным вузлом.
ГЛЯДЗІЦЕ ТАКСАМА:
Расейцы наступаюць адразу на двух кірунках Данеччыны, Вуглядар пад пагрозай атачэньняРасея працягвае атакаваць тылавыя рэгіёны Ўкраіны
У апэратыўным камандаваньні Паветраных сілаў Украіны паведамілі, што ў ноч на 2 кастрычніка Расея атакавала Кіраваградзкую, Адэскую і Сумскую вобласьці 32 ударнымі дронамі, якія запускалі з расейскай тэрыторыі — з Прыморска-Ахтарску і Курску.
«У выніку супрацьпаветранага бою авіяцыя, зэнітныя ракетныя падразьдзелы, РЭБ і мабільныя агнявыя групы Сілаў абароны Ўкраіны зьбілі 11 ударных бесьпілётнікаў у Кіраваградзкай, Адэскай і Сумскай вобласьцях. Чатыры варожыя дроны выйшлі з паветранай прасторы Ўкраіны ў кірунку Расеі», — адзначаецца ў паведамленьні.
Сродкі супрацьпаветранай абароны у выніку ўзьдзеяньня сродкаў радыёэлектроннай барацьбы згубілі лякацыю яшчэ 10 дронаў у паўночных і цэнтральных вобласьцях. Дакладную інфармацыю спрабуюць высьветліць.
Як паведаміў кіраўнік Адэскай абласной адміністрацыі Алег Кіпер, ад удару дронамі пацярпеў Ізмаільскі раён.
«Мэтай расейцаў была прыпартовая і памежная інфраструктура. Два мужчыны, кіроўцы грузавікоў, атрымалі раненьні. Адзін зь іх грамадзянін Турэччыны. Цяпер пацярпелыя ў стане сярэдняй цяжкасьці ў лякарні. Яны атрымліваюць усю неабходную дапамогу», — удакладніў Алег Кіпер.
Праз абстрэл часова спыніў працу пункт пропуску «Арлоўка» на мяжы з Румыніяй.
ГЛЯДЗІЦЕ ТАКСАМА:
Расея абстраляла жылы сэктар Запарожжа і прыпынак грамадзкага транспарту ў Херсоне. Ёсьць ахвярыВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.