Уладзімір Зяленскі падзякаваў прэзыдэнту Паўлу за ўсебаковую дапамогу Чэскай рэспублікі Ўкраіне, украінскім узброеным сілам і ўкраінскім ўцекачам. «Асабліва хачу падзякаваць за кожны ўкраінскі сьцяг, які я бачыў па дарозе з аэрапорта, мяне гэта кранула», — сказаў Зяленскі на сумеснай прэс-канфэрэнцыі з прэзыдэнтам Чэхіі.
Эфір Настоящего времени з прэсавай канфэрэнцыі па выніках перамоваў прэзыдэнтаў Чэхіі і Ўкраіны.
Прэзыдэнты Чэхіі і Ўкраіны
«Я правяду прадметныя перамовы з прэзыдэнтам Пэтрам Павэлам, прэм’ер-міністрам Пятром Фіалам, сьпікерамі Сэнату і Палаты дэпутатаў парлямэнту Мілашам Выстрчылам і Маркетай Пекаравай Адамавай, сустрэнуся з членамі ўрада, парлямэнта, прадстаўнікамі СМІ. У цэнтры ўвагі абароннае забесьпячэньне, эўрапейская і эўраатлянтычная інтэграцыя Ўкраіны і віленскі саміт NATO, сытуацыя вакол ЗААЭС, рэалізацыя Формулы міру, рэканструкцыя Ўкраіны» — напісаў напярэдадні Зяленскі ў сваім тэлеграм-канале.
Чэскія СМІ паведамілі, што Пэтэр Павэл вітаў Уладзімера Зяленскага на Праскім градзе, дзе месьціцца рэзыдэнцыя кіраўніка чэскага прэзыдэнта.
«Чэхія зьяўляецца важным саюзьнікам Кіева з пачатку расейскай агрэсіі. Зяленскі застанецца ў Празе да заўтра, у пятніцу ён сустрэнецца з іншымі вышэйшымі канстытуцыйнымі чыноўнікамі», — паведамляюць Seznam Zpravy.
Падчас выкананьня гімна Ўкраіны
Выданьне таксама адзначае, што «візыт украінскага лідэра суправаджаецца жорсткімі мерамі бясьпекі, Праскі Град быў зачынены для наведваньня ўвесь чацьвер. Пра візыт журналісты ведалі загадзя, але зь меркаваньняў бясьпекі інфармацыя была закрытая. Для паліцыі забесьпячэньне бясьпекі прэзыдэнта было адной з найбуйнейшых мераў, у якіх яны калі-небудзь прымалі ўдзел, паведаміла яна ў Twitter».
ГЛЯДЗІЦЕ ТАКСАМА:
Зяленскі заявіў, што бясьпека ўкраінскіх АЭС застаецца сярод асноўных выклікаў вайны7 ліпеня Зяленскі ўпершыню пасьля поўнамаштабнага ўварваньня Расеі ва Ўкраіну наведае Турэччыну для перамоваў з прэзыдэнтам Рэджэпам Эрдаганам, паведамляюць турэцкія дзяржаўныя СМІ.
Чакаецца, што на сустрэчы будзе абмяркоўвацца заключанае з Расеяй пры пасярэдніцтве Турэччыны і ААН пагадненьне аб дазволе на пастаўкі ўкраінскага збожжа з чарнаморскіх партоў. Расея заявіла, што можа заблякаваць пагадненьне, тэрмін якога заканчваецца 17 ліпеня.
Акрамя таго, чакаецца, што Зяленскі закліча Эрдагана даць «зялёнае сьвятло» сяброўству Швэцыі ў NATO перад самітам альянсу 11-12 ліпеня ў Вільні.
ГЛЯДЗІЦЕ ТАКСАМА:
Прэзыдэнт Чэхіі прыгадаў пра зьняволеных журналістаў беларускай Свабоды Кузьнечыка і ЛосікаГЛЯДЗІЦЕ ТАКСАМА:
Прэзыдэнт Чэхіі пра напад Расеі на Ўкраіну: «Гэта не вайна аднаго Пуціна, гэта расейская вайна»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.