Экспэрты амэрыканскага Інстытуту вывучэньня вайны (ISW) мяркуюць, што ўлады Белгарадзкай вобласьці і Міністэрства абароны Расеі не каардынуюць рэакцыі на «абмежаваныя памежныя рэйды» добраахвотнікаў, якія ваююць на баку Ўкраіны.
«Дысананс расейскіх адказаў і паведамленьняў аб рэйдзе ў Белгарадзкай вобласьці працягвае сьведчыць аб тым, што расейскае кіраўніцтва яшчэ ня вырашыла, як рэагаваць на гэтыя абмежаваныя памежныя рэйды», — адзначаецца ў справаздачы Інстытуту вывучэньня вайны.
Паводле экспэртаў, рэакцыя ў асноўным канцэнтруецца «на інфармацыйных эфэктах», і няма ніякіх прыкмет таго, што расейскае кіраўніцтва вызначыла больш шырокую палітыку па прадухіленьні далейшых абмежаваных рэйдаў у памежныя расейскія рэгіёны.
У Інстытуце вывучэньня вайны мяркуюць, што ўлады так і не змаглі арганізаваць эвакуацыю мясцовых жыхароў, нягледзячы на адпаведныя заявы кіраўніцтва Белгарадзкай вобласьці.
Апроч таго, экспэрты зьвяртаюць увагу на тое, што рэакцыя расейскіх уладаў на падзеі ў Белгарадзкай вобласьці выклікала новую хвалю крытыку з боку вайсковых блогераў, а таксама ўласьніка прыватнай вайсковай кампаніі Яўгенія Прыгожына і Ігара Гіркіна, які ўдзельнічаў у захопе Данецкай вобласьці ў 2014 годзе.
ГЛЯДЗІЦЕ ТАКСАМА:
У Белгарадзкай вобласьці за дзень ад абстрэлаў загінулі 5 чалавек, ва Ўкраіне — 6 загінулыхШто цяпер адбываецца ў Белгарадзкай вобласьці
У ноч на 6 чэрвеня губэрнатар Белгарадзкай вобласьці Вячаслаў Гладкоў паведаміў аб тым, што ў выніку атакі бесьпілётніка загарэўся адзін з энэргетычных аб’ектаў рэгіёну. Але ён запэўніў, што няма ні пацярпелых, ні адключэньняў ад электраэнэргіі.
Некаторыя ўкраінскія тэлеграм-каналы паведамляюць, што расейскія добраахвотнікі кантралююць некалькі населеных пунктаў у Белгарадзкай вобласьці.
Прадстаўнікі легіёну «Свабоды» пакуль не ўдакладняюць сытуацыю. Яны паведамілі, што ўлады Расеі адмовіліся ад перамоў па абмене палоннымі, таму захопленых расейскіх вайскоўцаў перадалі на падкантрольную тэрыторыю Ўкраіны ў так званы «Абменны фонд».
Ва ўмовах вайны і абмежаваньняў для незалежных СМІ на тэрыторыі Расеі высьветліць дакладную сытуацыю ў рэгіёне немагчыма.
ГЛЯДЗІЦЕ ТАКСАМА:
Губэрнатар Белгарадзкай вобласьці Расеі паведаміў пра «баі з дывэрсантамі» і заявіў, што гатовы сустрэцца для перадачы палонных расейцаўВыведка Вялікай Брытаніі: абстрэлы Расеі ўсё больш неэфэктыўныя
У выведцы Міністэрства абароны Вялікай Брытаніі паведамілі, што цягам траўня Расея выкарыстала супраць Украіны больш за 300 іранскіх бесьпілётных лятальных апаратаў, што стала найбольшай колькасьцю за апошні час.
«Падобна, Расея запускае так шмат дронаў, спрабуючы прымусіць Украіну выпусьціць запасы каштоўных сучасных ракет супрацьпаветранай абароны. Наўрад ці Расея дамаглася асаблівага посьпеху: Украіна нэўтралізавала як мінімум 90% бесьпілётнікаў, у асноўным выкарыстоўваючы сваю старую і больш танную зброю супрацьпаветранай абароны і радыёэлектронныя перашкоды», — адзначылі брытанскія выведнікі.
У вайсковай выведцы Вялікай Брытаніі, аналізуючы вынікі расейскіх абстрэлаў па тылавых рэгіёнах Украіны, прыйшлі да высновы, што Расея «застаецца вельмі неэфэктыўнай пры паразе такіх дынамічных мэтаў на вялікай адлегласьці празь яе дрэнныя працэсы навядзеньня».
ГЛЯДЗІЦЕ ТАКСАМА:
Выведка Ўкраіны: У Расеі можа пачацца мяцеж або ваеннае супрацьстаяньнеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.