Крэмль халаднавата выказаўся наконт пляну Кітая ў спыненьні вайны ва Ўкраіне. У Маскве заклікалі вывучыць нюансы прапановы, якая заклікае абодва бакі пагадзіцца на паступовую дээскаляцыю і перасьцерагае ад выкарыстаньня ядзернай зброі. Пра гэта паведаміла агенцтва «Рэйтэр».
Кітай, які абвясьціў аб «бязьмежным» саюзе з Расеяй незадоўга да таго, як Масква пачала поўнамаштабнае ўварваньне ва Ўкраіну, у пятніцу прадставіў уласны мірны плян.
Па словах афіцыйнага прадстаўніка Крамля Дзьмітрыя Пяскова, заява якога была апублікаваная ў аўторак, голас Пэкіна павінен быць пачуты, але важныя нюансы прапановы.
«Вядома, дэталі павінны быць старанна прааналізаваныя з улікам інтарэсаў усіх бакоў. Гэта вельмі доўгі і інтэнсіўны працэс», – заявіў ён у інтэрвію «Известиям».
Рэакцыя на кітайскі плян у Кіеве
Прэзыдэнт Украіны Ўладзімір Зяленскі падчас прэс-канфэрэнцыі на мінулым тыдні заявіў, што прапанова Кітая «не інфраструктура для чагосьці. Ёсьць нейкія пункты, якія мне зразумелыя. Ёсьць думкі, зь якімі я ня згодзен».
У сваю чаргу міністар замежных спраў Украіны Дзьмітро Кулеба заявіў, што ўкраінскі бок пільна вывучыць прапанаваны Кітаем мірны плян.
Андрэй Ярмак, кіраўнік Офісу прэзыдэнта Ўкраіны, заявіў, што абнародаваная Кітаем пазыцыя зьяўляецца добрым сыгналам патэнцыйнай гатоўнасьці ўзяць удзел у мірным урэгуляваньні.
«Аднак неабходна паглядзець на дзеяньні. Трэба дакладна зразумець, што Кітай насамрэч мае на ўвазе і што ён гатовы зрабіць, каб дапамагчы завяршыць гэтую вайну. Будзе вельмі вялікай і небясьпечнай памылкай, калі Кітай вырашыць пастаўляць любое ўзбраеньне і тое, што дапаможа расейцам і далей забіваць украінцаў, зьнішчаць цывільную інфраструктуру. І гэта будзе супярэчыць той пазыцыі мірнага ўрэгуляваньня, якую Кітай дэкляруе», — сказаў Андрэй Ярмак.
Рэакцыя Эўразьвязу
Вярхоўны прадстаўнік Эўрапейскага Зьвязу ў пытаньнях замежных спраў і палітыкі бясьпекі Жузэп Бурэль заявіў 27 лютага, што дасягнуць спыненьня вайны ва Ўкраіне магчыма на аснове рэзалюцыі Генэральнай асамблеі ААН і мірнага пляну, прапанаванага ўкраінскім прэзыдэнтам Уладзімірам Зяленскім.
«Кітай прапанаваў свой „пазыцыйны дакумэнт“ аб палітычным урэгуляваньні. Ён не зьяўляецца мірным плянам і пераважна паўтарае вядомыя кітайскія пазыцыі, частку зь якіх падзяляем, а частку — не», — напісаў Жузэп Барэль у сваім блогу, апублікаваным на афіцыйным сайце эўрапейскай дыпляматыі.
У той жа час кіраўнік эўрапейскай дыпляматыі дадаў, што пільна вывучаць і прааналізуюць прапановы кітайскага ўраду.
«Але ўжо цяпер зразумела, што ключавой праблемай зьяўляецца тое, што ён не адрозьнівае агрэсара ад ахвяры, ставячы бакі на адзін узровень», — адзначыў ён.
«Расейская вайна і напружанасьць у дачыненьнях між Кітаем і ЗША разрываюць тое, што мы часта называем „міжнародным парадкам, які грунтуецца на правілах“. Але ў той жа час большасьць краін усё яшчэ спадзяецца на тое, што ААН знайдзе рашэньне», — падкрэсьліў Жазэп Барэль.
ГЛЯДЗІЦЕ ТАКСАМА:
У Брусэлі не пабачылі ў прапановах Кітаю мірнага пляну і пацьвердзілі падтрымку ўкраінскай формулы міруЛукашэнка таксама хоча абмеркаваць кітайскі мірны плян
У Беларусі анансавалі візыт Аляксандра Лукашэнкі ў Кітай. Ён адбудзецца з 28 лютага па 2 сакавіка.
У праграме візыту — перамовы Лукашэнкі і старшыні КНР Сі Цзіньпіня, шэраг сустрэч з вышэйшымі службовымі асобамі КНР, кіраўніцтвам кітайскіх карпарацый.
«У цэнтры ўвагі будуць пытаньні разьвіцьця гандлёва-эканамічнага, інвэстыцыйнага і гуманітарнага супрацоўніцтва, рэалізацыя сумесных маштабных праектаў, узаемадзеяньне ў палітычнай сфэры, рэагаваньне на найбольш вострыя выклікі ў сучаснай міжнароднай абстаноўцы», — гаворыцца ў паведамленьні прэс-службы Лукашэнкі.
Перад сваёй паездкай у Пэкін у інтэрвію кітайскім СМІ Лукашэнка ў пазытыўным ключы ацаніў мірныя ініцыятывы Кітаю, якія на той момант яшчэ не былі апублікаваныя.
ГЛЯДЗІЦЕ ТАКСАМА:
«Вельмі адпавядае нашым асьцярогам». У ЗША пракамэнтавалі візыт Лукашэнкі ў КітайВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.