Экспэрты амэрыканскага Інстытуту вывучэньня вайны (ISW) заявілі, што апошнія паведамленьні пра баі на ўсходзе Ўкраіны сьведчаць аб аднаўленьні расейскай ініцыятывы.
«Тэмп расейскіх апэрыцый уздоўж лініі Сватавае — Крамянная на захадзе Луганскай вобласьці прыкметна павялічыўся цягам апошняга тыдня», — адзначаецца ў штодзённай справаздачы ISW.
Паводле экспэртаў, расейская армія патроху прасоўваецца ўздоўж мяжы Харкаўскай і Луганскай абласьцей, і гэта пацьвердзілі геалякацыйныя кадры баявых дзеяньняў.
ГЛЯДЗІЦЕ ТАКСАМА:
Улады Луганшчыны паказалі цалкам зьнішчаны пасёлак і заявілі, што расейскі снайпэр застрэліў яго апошнюю жыхаркуУ справаздачы адзначаецца, што Расея падцягнула на луганскі кірунак падразьдзелы адразу некалькіх дывізій, што можа сьведчыць аб пачатку вялікага наступу.
У той жа час аналітыкі адзначаюць, што наступальная апэрацыя яшчэ не дасягнула неабходнага тэмпу, бо Расея пакуль не далучыла да баявых дзеяньняў падразьдзелы 2-й мотастралковай дывізіі, якую ў студзені перадысьлякавалі зь Беларусі ў Луганскую вобласьць.
«Расейскія войскі паступова пачынаюць наступ, але ягоны посьпех немагчыма вызначыць наперад. Хоць расейскія сілы ў Луганскай вобласьці цяпер маюць ініцыятыву, поўнае далучэньне гэтых сіл можа прывесьці да канчатковай кульмінацыі ўздоўж лініі Сватавае — Крамянная. Гэтая кульмінацыя, імаверна, адкрые вакно магчымасьцяў для контранаступу ўкраінскіх войскаў», — адзначылі экспэрты Інстытуту вывучэньня вайны.
У брытанскай выведцы лічаць, што надвор’е перашкодзіць расейскаму наступу
У выведцы Міністэрства абароны Вялікай Брытаніі заявілі, што надвор’е працягвае адыгрываць значную ролю ў ходзе вайны Расеі ва Ўкраіне.
«8 лютага тэмпэратура на глебе была каля 0 градусаў. Цягам наступнага тыдня, паводле прагнозаў, павышэньне тэмпэратуры і раставаньне сьнегу, імаверна, яшчэ больш пагоршаць умовы перамяшчэньня тэхнікі», — адзначылі брытанскія выведнікі.
Паводле іх, найгоршыя ўмовы надвор’я будуць у сярэдзіне і канцы сакавіка, таму абодва бакі могуць пазьбягаць плянаваць наступы на гэты час.
«Аднак уяўныя палітычныя або апэратыўныя магчымасьці могуць пераважыць такія асьцярогі, як гэта ўжо прадэманстраваў пачатак уварваньня Расеі ў канцы лютага 2022 года», — мяркуюць у вайсковай выведцы Вялікай Брытаніі.
ГЛЯДЗІЦЕ ТАКСАМА:
Заходнія выведкі: Расеі не хапае ўзбраеньня, але яна паспрабуе наступаць да перадачы замежнай зброі ЎкраінеУ Генштабе Ўкраіны назвалі кірункі наступу Расеі
Сьпікер Генэральнага штабу Ўзброеных сіл Украіны Аляксандар Штупун паведаміў, што расейскія войскі канцэнтруюць свае намаганьні на вядзеньні наступу на купянскім (Харкаўская вобласьць), ліманскім, бахмуцкім, аўдзееўскім і навапаўлаўскім кірунках (Данецкая вобласьць).
«За апошнія содні падразьдзелы сілаў абароны адбілі атакі акупантаў у раёнах населеных пунктаў Стэльмахаўка і Белагораўка Луганскай вобласьці, 16 населеных пунктаў Данецкай вобласьці, а таксама каля Новаандрэеўкі на Запарожжы», — паведаміў Аляксандар Штупун.
ГЛЯДЗІЦЕ ТАКСАМА:
Інстытут вывучэньня вайны аб загадзе захапіць Данбас да сакавіка: Пуцін зноў пераацэньвае магчымасьці арміі РФВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.