Нямеччына ўхваліла пастаўку 178 танкаў тыпу «Леапард 1» Украіне

Урад Нямеччыны ўхваліў пастаўку агулам 178 танкаў тыпу «Леапард 1» Украіне. Пра гэта гаворыцца ў сумеснай заяве міністэрства эканомікі і міністэрства абароны Нямеччыны.

Колькі танкаў будзе пастаўлена і калі, залежыць ад іх стану і «неабходных рамонтных работ». Цяпер танкі знаходзяцца на прадпрыемствах абароннай прамысловасьці або ў буйных сховішчах.

Як паведамляе партал інфармацыйнай праграмы Tagessschau агульнанацыянальнага тэлеканалу ARD, першыя два дзясяткі баявых машын павінны быць гатовыя да адпраўкі да лета. Канчатковай мэтай зьяўляецца пастаўка Кіеву больш за 100 танкаў у першым ці другім квартале 2024 году.

Паводле інфармацыі выданьня Spiegel, адміністрацыя канцлера Нямечыны рыхтавала зьдзелку па пастаўцы «Леапард 1» працяглы час. Газэта Süddeutsche Zeitung таксама паведамляла, што нямецкае абароннае прадпрыемства правядзе рамонт 90 баявых машын гэтага тыпу, якія ўжо некалькі гадоў стаяць у сховішчах.

Яшчэ 88 танкаў «Леапард 1» будуць прывезеныя з Італіі. Абаронны канцэрн Rheinmetall ужо некалькі месяцаў таму атрымаў магчымасьць закупіць там старыя машыны. Выдаткі па рамонце танкаў будзе несьці ўрад Нямеччыны. Фінансавыя сродкі будуць выдзеленыя з пакета дапамогі ўкраінскаму войску.

ГЛЯДЗІЦЕ ТАКСАМА:

Нямеччына пагадзілася на адпраўку танкаў «Леапард» Украіне

У Кіеў сёньня прыбыў кіраўнік Мінабароны Нямеччыны Барыс Пісторыюс. Ён пацьвердзіў зьвесткі пра будучыя пастаўкі «Леапард 1» і ўдакладніў, што Ўкраіна атрымае гэтыя танкі з шэрагу эўрапейскіх краінаў.

Бундэсвэр канчаткова перастаў выкарыстоўваць «Леапард 1» у 2003 годзе і замяніў іх новай мадэльлю «Леапард 2». Гэты тып машын хутчэйшы і нашмат лепш браніраваны.

Каля двух тыдняў таму канцлер Олаф Шольц заявіў аб гатоўнасьці Нямеччыны паставіць Украіне 14 сучасных танкаў тыпу «Леапард 2» з запасаў бундэсвэру. Яны павінны быць перададзены ўкраінскай арміі ў канцы сакавіка.

Бэрлін спрабуе пераканаць іншыя эўрапейскія краіны і іншых партнэраў па NATO абсталяваць, сама меней, два батальёны танкамі «Леапард 2». Канцлер, як піша выданьне Spiegel, асабіста правёў тэлефонныя перамовы з лідэрамі эўрапейскіх краінаў, але да гэтага часу згоды ні ад адной краіны не паступіла.

ГЛЯДЗІЦЕ ТАКСАМА:

Вялікая Брытанія афіцыйна заявіла, што паставіць Украіне танкі «Чэленджэр 2» і самазарадныя гаўбіцы AS90

Урад Нямеччыны спрабуе таксама нарыхтаваць дастаткова баявых снарадаў для «Леапард 2». Прадстаўнікі абаронных прадпрыемстваў паведамляюць, што да адпраўкі гатовы толькі 25 тысяч адзінак боепрыпасаў. Ужо зараз можа быць запушчаны выраб снарадаў калібру 105 мм, але іх пастаўка можа пачацца толькі празь некалькі месяцаў.

Паводле інфармацыі Süddeutsche Zeitung, праблему ўяўляе таксама транспартаваньне шматтонных баявых машын па чыгунцы. Нямеччыне трэба будзе праверыць стан чыгуначнага палатна і мастоў на ўсім участку шляху.

ГЛЯДЗІЦЕ ТАКСАМА:

Шольц: Будзем пазьбягаць эскаляцыі, якая можа прывесьці да вайны РФ і NATO

Кіеў неаднаразова зьвяртаўся да ўраду Бэрліну з просьбай аб пастаўках «Леапардаў». У апошнія месяцы ўкраінскі бок гаварыў аб неабходнасьці мець сама меней 300 сучасных машын тыпу «Леапард 2».
У студзені Нямеччына пасьля доўгіх ваганьняў ухваліла пастаўкі ва Ўкраіну сваіх асноўных баявых танкаў «Леапард 2» як непасрэдна з запасаў Бундэсвэру, гэтак і ад краінаў Эўразьвязу, якія раней закуплялі гэтыя танкі.
Кіеў і Бэрлін заяўлялі, што танкі ня будуць выкарыстоўвацца на тэрыторыі Расеі ў яе афіцыйна прызнаных сусьветнай супольнасьцю межах. Тэхніка будзе задзейнічаная толькі для вызваленьня тэрыторыі Ўкраіны.
Амбасадар Расеі ў Нямеччыне Сяргей Нячаеў назваў рашэньне Бэрліну па танках «вельмі небясьпечным». «Рашэньне пераводзіць канфлікт на новы ўзровень супрацьстаяньня і супярэчыць заявам нямецкіх палітыкаў аб нежаданьні Нямеччыны ўцягвацца ў яго», — сказаў Нячаеў. Прадстаўнік Крамля Дзьмітрый Пяскоў заявіў, што пастаўкі «Леапардаў» не абяцаюць нічога добрага для будучых адносін Бэрліну і Масквы.

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.

Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.