Прэзыдэнтка Эўрапейскай камісіі Урзуля фон дэр Ляен заявіла, што да 24 лютага, да гадавіны пачатку расейскай агрэсіі супраць Украіны, у дзеяньне будзе ўведзены 10-ы пакет санкцыйных захадаў супраць Расеі.
«Мы з нашымі партнэрамі па G7 абмяжуем цану на расейскія нафтапрадукты, і да 24 лютага, роўна праз год пасьля пачатку ўварваньня, мы маем мэту ўвесьці ў дзеяньне дзясяты пакет санкцый», — заявіла Ўрзуля фон дэр Ляен на супольнай з прэзыдэнтам Украіны Ўладзімірам Зяленскім прэсавай канфэрэнцыі ў Кіеве 2 лютага.
Прэзыдэнтка Эўракамісіі дадала, што адначасова абмяркоўваецца мэханізм, каб прымусіць Расею кампэнсаваць Украіне страты, панесеныя ў выніку расейскай агрэсіі.
Расказваючы пра дзясяты пакет санкцый, Урзуля фон дэр Ляен увогуле не згадала Беларусь.
У той жа час карэспандэнт Радыё Свабода ў Брусэлі Рыкард Юзьвяк паведаміў на сваёй старонцы ў Twitter, што ўсярэдзіне Эўразьвязу няма прагрэсу наконт санкцый супраць Беларусі і перагляду абмежаваньня цэнаў на расейскую нафту.
«Новыя сустрэчы заплянаваныя на пятніцу і нядзелю», — напісаў журналіст.
У сваю чаргу, Уладзімір Зяленскі адзначыў, што Расея вельмі хутка адаптуецца да санкцый, таму неабходна зрабіць так, каб абыходзіць санкцыі стала немагчыма. І гэта, паводле яго, — агульнае заданьне Ўкраіны і Эўразьвязу.
«Цяпер мы бачым, што санкцыйны тэмп Эўропы крыху запаволіўся. Дзяржава-тэрарыстка, наадварот, павялічвае тэмп адаптацыі да санкцый. І гэта трэба выправіць. Мы верым, што мы гэта з вамі зможам», — сказаў Уладзімір Зяленскі, зьвяртаючыся да Ўрзулі фон дэр Ляен.
ГЛЯДЗІЦЕ ТАКСАМА:
У Кіеў на саміт прыбыло кіраўніцтва і амаль поўны склад Эўракамісіі. Украіна хоча пачаць перамовы аб уступленьні ў ЭўразьвязЭўразьвяз мабілізаваў амаль 50 мільярдаў эўра на дапамогу Ўкраіне
Камісар у Эўрапейскай палітыцы суседзтва і перамовах аб пашырэньні Олівэр Вархеі на супольным пасяджэньні з украінскім урадам паведаміў, што Эўразьвяз гатовы ўнесьці зьмены ў даваенны эканамічны плян фінансавай дапамогі Ўкраіне, а таксама далучыцца да яе аднаўленьня.
«На сёньня як Эўразьвяз разам з краінамі-сябрамі мы мабілізавалі 49,5 мільярда эўра на падтрымку Ўкраіны», — паведаміў ён.
Паводле яго, важную ролю ў дапамозе павінна адыграць фінансавая каардынацыйная плятформа, так званы «фінансавы Рамштайн».
ГЛЯДЗІЦЕ ТАКСАМА:
Польшча хоча далучэньня Ўкраіны да Эўразьвязу «за некалькі гадоў», але ёсьць умоваЭЗ падрыхтуе ўдвая больш украінскіх вайскоўцаў і выдзеліць грошы на разьмінаваньне
Кіраўнік эўрапейскай дыпляматыі Жузэп Бурэль абвясьціў, што Эўразьвяз дадаткова падрыхтуе яшчэ 15 тысяч украінскіх вайскоўцаў. «Расея вярнула вайну ў Эўропу, але Ўкраіна працягвае супраціў. Рады паведаміць прэм’ер-міністру Дзянісу Шмыгалю, што Місія вайсковай дапамогі ЭЗ (European Union Military Assistance Mission) навучыць дадаткова 15 тысяч украінскіх жаўнераў, у выніку чаго агульная колькасьць пэрсаналу, які пройдзе навучаньне, дасягне 30 тысяч асобаў», — напісаў Жузэп Бурэль на сваёй старонцы ў Twitter.
У прыватнасьці, украінцаў будуць навучаць, як эксплюатаваць эўрапейскую бранятэхніку, уключна з танкамі «Leopard 2», якія краіны ЭЗ найбліжэйшым часам перададуць Украіне.
Жузэп Бурэль таксама паведаміў, што Эўразьвяз выдзеліць 25 мільёнаў эўра на абясшкоджваньне мінаў.
ГЛЯДЗІЦЕ ТАКСАМА:
Расплата за вайну і палітычны тэрор. Чаму Эўразьвяз рыхтуе новыя санкцыі супраць БеларусіВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.