У брытанскай выведцы зьвярнулі ўвагу на тое, што Расея 14 студзеня аднавіла ўдары па ўкраінскай інфраструктуры толькі праз 15 дзён пасьля апошняга абстрэлу.
«Вялікая супрацькарабельная ракета AS-4 KITCHEN, запушчаная зь сярэдняга бамбавіка Ту-22М3 BACKFIRE, хутчэй за ўсё, трапіла ў жылы дом у Дніпры, што прывяло да гібелі сама меней 40 грамадзян», — паведаміла выведка Міністэрства абароны Вялікай Брытаніі.
У NATO ракетай AS-4 KITCHEN клясыфікуюць расейскія ракеты, вядомыя як Х22. У Паветраных сілах Украіны таксама пацьвердзілі, што Расея пры абстрэле Дніпра выкарыстоўвала менавіта гэтую зброю.
Брытанскія выведнікі нагадалі, што раней гэтымі ж ракетамі летась 27 чэрвеня Расея абстраляла гандлёвы цэнтар у Крэменчуку.
«Расея лжыва намякнула, што адказнасьць нясе ўкраінская супрацьпаветраная абарона. Ракеты AS-4 KITCHEN, як вядома, зьяўляюцца недакладнымі пры выкарыстаньні па наземных цэлях, бо іх радыёлякацыйная сыстэма навядзеньня дрэнна адрозьнівае цэлі ў гарадзкіх раёнах», — адзначылі ў выведцы Вялікай Брытаніі.
Паводле іх, выкарыстаньне недакладных ракет для абстрэлаў падкрэсьлівае адсутнасьць у Расеі магчымасьцяў наносіць удары. «Імаверна, ім цяжка дынамічна ідэнтыфікаваць цэлі і атрымліваць доступ да хуткай і дакладнай ацэнкі баявой шкоды», — патлумачылі ў брытанскай выведцы.
Наступствы ракетнага абстрэлу Дніпра, 14 студзеня
У Дніпры працягваюць разьбіраць завалы
Паводле гарадзкіх уладаў Дніпра, колькасьць загінулых мірных жыхароў павялічылася — завалы працягваюць разьбіраць, але шанцы знайсьці жывых мізэрныя.
На раніцу 17 студзеня загінулымі лічаць 44 грамадзяніна, у тым ліку чацьвярых дзяцей. Сярод знойдзеных целаў 16 ня могуць ідэнтыфікаваць. Пошукавыя працы скончылі апоўдні 17 студзеня.
ГЛЯДЗІЦЕ ТАКСАМА:
Людзі загінулі цэлымі сем’ямі. Ратавальнікі расказалі дэталі расейскага ракетнага нападу на дом у ДніпрыРатавальнікі працягваюць шукаць пад заваламі яшчэ 25 жыхароў.
У лякарнях горада знаходзяцца 30 пацярпелых ад ракетнага ўдару грамадзян.
У ААН асудзілі ўдар Расеі па жылым раёне Дніпра
Генэральны сакратар ААН Антонію Гутэрыш асудзіў ракетны ўдар па жылым доме ў Дніпры 14 студзеня.
«Генэральны сакратар асудзіў гэты напад і заявіўшы, што гэта яшчэ адзін прыклад парушэньня законаў вайны», — сказала Стэфані Трэмбле, прадстаўніца Офісу генэральнага сакратара ААН.
Паводле яе, каардынатар ААН у гуманітарных пытаньнях ва Ўкраіне Дэніз Браўн заклікала да належнага расьсьледаваньня ваенных злачынстваў і судовага перасьледу падазраваных.
ГЛЯДЗІЦЕ ТАКСАМА:
Служба бясьпекі Ўкраіны ідэнтыфікавала расейцаў, датычных да ракетнага ўдару па ДніпрыРасея вывела ў Чорнае мора рэкордную колькасьць караблёў-ракетаносьбітаў
Кіраўніца Аб’яднанага каардынацыйнага прэс-цэнтру Сіл абароны поўдня Натальля Гумянюк заявіла, што Расея каторы дзень трымае ў Чорным моры на баявым дзяжурстве шэсьць караблёў, якія маюць на ўзбраеньні ракеты «Калібар».
«Сёньня агульны залп на ўсіх 6 ракетаносьбітах, якія стаяць на баявым дзяжурстве ў Чорным моры, мы ацэньваем у 44 ракеты. Мы гаворым, што ракетная пагроза і такая колькасьць — усё гэта можа сьведчыць аб працягу ракетных удараў», — паведаміла Натальля Гумянюк у эфіры ўсеўкраінскага тэлемаратону #UРазом.
Паводле яе, 44 ракеты — гэта максымальна магчымы залп для шасьці ракетаносьбітаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.