Прэзыдэнт Польшчы Анджэй Дуда заявіў, што рота танкаў, якія Варшава павінна даць Украіне — гэта сымбалічная колькасьць, але Польшча будзе дамагацца, каб яе прыклад перанялі іншыя краіны.
«Мы будзем дамагацца на міжнароднай арэне, каб гэтая кааліцыя была створаная шэрагам краін, якія будуць рабіць свой унёсак у выглядзе танкаў, каб можна было стварыць большае танкавае падразьдзяленьне. Рота — гэта невялікае падразьдзяленьне, я б нават сказаў сымбалічны, але калі такіх рот будзе больш, то будзе створана брыгадная баявая група або яшчэ большая вайсковая частка, фактычна якая мае вялікае ваеннае значэньне ў абароне Ўкраіны — гэта тое, чаго мы хочам дасягнуць», — сказаў Дуда, паведамляе Польскае радыё.
Ён спадзяецца, што такое фармаваньне, абсталяванае тэхнікай паводле стандартаў NATO, зможа стварыць «сур’ёзную блякаду, жалезную сьцяну для расейскай агрэсіі супраць Украіны».
11 студзеня падчас візыту ў Львоў Анджэй Дуда паведаміў, што Польшча прыняла рашэньне аб перадачы Украіне танкаў Leopard 2.
«Мы прынялі рашэньне аб перадачы такой падтрымкі Ўкраіне з боку Польшчы. Рота танкаў Leopard будзе перададзеная ў рамках кааліцыі. Неабходна атрымаць афіцыйную згоду і выбудаваць міжнародную кааліцыю. Мы ўхвалілі яе сфармаваць. Першая група Leopard разам зь іншымі тыпамі танкаў, спадзяюся, будзе перададзена іншымі краінамі вельмі хутка, каб узмацніць абаронную здольнасьць Украіны», — заявіў Дуда.
Па дадзеных выданьня Defence Express, рота танкаў у Польшчы, як і ў краінах NATO, — гэта 14 машын.
Нямецкі канцлер Оляф Шольц выступае на фоне танка Leopard 2
Украіна неаднаразова заяўляла аб патрэбе ў сучасных танках. Яшчэ ў верасьні 2022 года выданьне Politico са спасылкай на свае крыніцы пісала, што Украіна папрасіла Захад аб тэрміновых пастаўках сучасных танкаў, каб дабіцца посьпеху пры контранаступе на паўночным усходзе краіны, але партнэры зацягваюць.
ГЛЯДЗІЦЕ ТАКСАМА:
Дуда, Зяленскі, Наўседа сустрэліся ў Львове: Польшча абяцала Ўкраіне танкі Leopard 2Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.