Служба бясьпекі Ўкраіны абвясьціла ў міжнародны вышук грамадзянку Расеі Вольгу Быкоўскую, якая заклікала свайго мужа, расейскага вайскоўца Рамана Быкоўскага, гвалтаваць украінскіх жанчын.
Як паведаміла Служба бясьпекі Ўкраіны, сьледчыя сабралі бясспрэчныя доказы таго, як жыхарка акупаванага Крыму падбухторвала свайго мужа, які ваяваў на тэрыторыі Ўкраіны, да гвалту над цывільнымі грамадзянамі Ўкраіны.
Супраць Вольгі Быкоўскай завялі крымінальную справу паводле ч. 1 артыкула 438 (парушэньне законаў і звычаяў вайны) Крымінальнага кодэксу Ўкраіны. Гэтыя дзеяньні караюцца 12 гадамі пазбаўленьня волі.
Сёлета ў красавіку Служба бясьпекі апублікавала запіс тэлефоннай размовы Рамана і Вольгі Быкоўскіх. У ёй Вольга заклікала:
«Ты давай там, гвалтуй украінскіх баб. Толькі мне нічога не кажы. Зразумеў? Каб я нічога ня ведала».
Ейны муж перапытаў: «Можна, так?».
«Так, дазваляю. Толькі засьцерагайся», — адказала яна і расьсьмяялася.
ГЛЯДЗІЦЕ ТАКСАМА:
«Гвалтуй украінскіх баб, толькі мне не кажы». СБУ апублікавала новыя перахопы размоў расейскіх салдат са сваякаміПазьней журналісты праекту Радыё Свабода «Схемы» вызначылі іхныя імёны і запісалі зь імі тэлефонныя размовы, якія пацьвердзілі ідэнтычнасьць тых галасоў, якія гучалі ў запісе, апублікаваным СБУ. Абое паходзяць з Арлоўскай вобласьці Расейскай Фэдэрацыі.
ГЛЯДЗІЦЕ ТАКСАМА:
«Гвалтуй украінскіх баб, толькі мне не кажы». Ідэнтыфікавалі вайскоўца Расеі зь перахопленай СБУ размовы з жонкайЗ пачатку поўнамаштабнай ваеннай агрэсіі Расеі ўкраінскія сьледчыя зафіксавалі 154 факты сэксуальнага гвалту. Ужо паведамілі аб падазрэньні шасьцём вайскоўцам РФ. Накіравалі ў суд абвінаваўчыя акты на дзьве асобы, аднаго грамадзяніна асудзілі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.