У той жа час брытанскія выведнікі ня могуць пацьвердзіць лічбы расейскіх авіястратаў, агучаных вайсковым кіраўніцтвам Украіны. Галоўнакамандуючы войска Ўкраіны Валер Залужны 3 лістапада заявіў, што Расея страціла ўва Ўкраіне сваёй авіяцыі больш, чым у часе савецкай вайны ў Афганістане.
«Нягледзячы на тое, што мы ня можам незалежна праверыць гэтыя лічбы, брак перавагі Расеі ў паветры, імаверна, пагаршаецца дрэннай падрыхтоўкай, стратай дасьведчаных экіпажаў і павышанымі рызыкамі непасрэднай падтрымкі з паветра ў зонах шчыльнай супрацьпаветранай абароны», — адзначылі ў выведцы Вялікай Брытаніі.
У брытанскай выведцы мяркуюць, што такая сытуацыя наўрад ці зьменіцца ў бліжэйшыя некалькі месяцаў.
«Страты расейскіх самалётаў, хутчэй за ўсё, значна перавышаюць іхныя магчымасьці вырабляць новыя самалёты. Час, патрэбны для рыхтаваньня кампэтэнтных пілётаў, яшчэ больш зьніжае здольнасьць Расеі аднавіць баявы патэнцыял», — адзначылі ў выведцы Міністэрства абароны Вялікай Брытаніі.
ГЛЯДЗІЦЕ ТАКСАМА:
20 БМП, 100 танкаў, тысячы тон боепрыпасаў. Як Беларусь дапамагае Расеі зброяй і навоштаІнстытут вывучэньня вайны: Расея скарачае ядзерную рыторыку
Экспэрты амэрыканскага Інстытуту вывучэньня вайны (ISW) зьвяртаюць увагу, што кіраўніцтва Расеі зьменшыла выкарыстаньне рыторыкі наконт выкарыстаньня ядзернай зброі.
У Інстытуце вывучэньня вайны мяркуюць, што заявы пра магчымае выкарыстаньне ядзернай зброі былі дзеля прымушэньня Ўкраіны да перамоваў.
Як адзначаецца ў справаздачы Інстытуту, выкарыстаньне Расеяй ядзернай зброі застаецца малаімаверным, і Крэмль цяпер зьмяншае сваю ядзерную рыторыку.
У ISW не выключаюць, што Крэмль растлумачыў сваю ядзерную палітыку ў часе кантактаў дарадцы ЗША ў нацыянальнай бясьпецы Джэйкам Саліванам з памочнікам расейскага прэзыдэнта ў замежнай палітыцы Юрыем Ушаковым і сакратаром Савету бясьпекі Расеі Нікалаем Патрушавым.
Экспэрты Інстытуту вывучэньня вайны не выключаюць, што Крэмль можа зноў вярнуцца да ядзернай рыторыкі, каб прымусіць ЗША і іх хаўрусьнікаў ціснуць на Ўкраіну, каб тая пачала перамовы з Расеяй.
«Украіна і яе міжнародныя партнэры дакладна далі зразумець, што яны не пагодзяцца на перамовы пад руляй пісталета і не адмовяцца ад сувэрэннага права Ўкраіны на свае тэрыторыі», — паведамілі экспэрты.
ГЛЯДЗІЦЕ ТАКСАМА:
Расея ня здолела зьнішчыць ва Ўкраіне ніводнага HIMARS, – крыніца ў ПэнтагонеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.