Новае сацыялягічнае апытаньне, праведзенае агенцтвам Gallup у мінулым месяцы і апублікаванае на гэтым тыдні, паказаў, што 70% украінцаў хочуць працягваць вайну з Расеяй да перамогі, а 91% рэспандэнтаў заявіў, што перамога азначае вяртаньне пад кантроль усёй украінскай тэрыторыі, захопленай Расеяй, у тым ліку Крыму. Пра вынікі апытаньня піша «Голас Амэрыкі».
Апытаньне праводзілася ў верасьні на фоне аптымістычных настрояў ва ўкраінскім грамадзтве ў сувязі зь перамогамі на палях бітваў і перад апошняй хваляй расейскіх авіяўдараў па ўкраінскіх гарадах.
Вынікі апытаньня сьведчаць пра моцную падтрымку пазыцыі прэзыдэнта Ўкраіны Ўладзіміра Зяленскага, які ў канцы мінулага месяца заявіў, што ня будзе дабівацца спыненьня вайны шляхам перамоваў да таго часу, пакуль Уладзімір Пуцін застаецца прэзыдэнтам Расеі.
Выступіўшы неўзабаве пасьля таго, як Пуцін абвясціў незаконную «анэксію» Расеяй чатырох украінскіх тэрыторый, Зяленскі сказаў: «Украіна ня будзе весьці ніякіх перамоваў з Расеяй, пакуль Пуцін зьяўляецца прэзыдэнтам Расеі. Мы будзем весьці перамовы, але з новым прэзыдэнтам».
ГЛЯДЗІЦЕ ТАКСАМА:
На прыцэле Кіеў, Жытомір, Дніпро, Мікалаеў: Расея не спыняе атакі ракетамі і дронамі па энэргааб’ектах УкраіныНа момант правядзеньня апытаньня ўкраінскія войскі падчас контранаступу адваявалі вялікія ўчасткі тэрыторыі на ўсходзе, узьняўшы баявы настрой жыхароў Украіны. Украінскія Ўзброеныя сілы зараз набліжаюцца да Херсона, аднак прагрэс у гэтым раёне замарудзіўся, у той час як Расея адказала сэрыяй разбуральных паветраных нападаў на цывільныя аб’екты і інфраструктуру па ўсёй Украіне.
Як паказала сацапытаньне, падтрымка вядзеньня вайны аж да перамогі наймацнейшая ў рэгіёнах, найбольш аддаленых ад баявых дзеяньняў, і значна слабейшая ў рэгіёнах, дзе ідзе вайна.
«Падтрымка ваенных дзеяньняў найбольш высокая ў такіх месцах, як Кіеў (83%), а таксама ў заходніх (82%), цэнтральных (78%) і паўночных (75%) рэгіёнах краіны. Значна менш значная большасьць насельніцтва на ўсходзе (56%) і поўдні (58%) падтрымліваюць працяг вайны», — паведамляе Gallup.
«Там, дзе вайна стаіць проста ля вашага парога, ваша галоўная задача — проста спыніць баявыя дзеяньні, спыніць гвалт, які працягваецца», — сказаў прадстаўнік Gallup Р. Дж. Рэйнхарт у тэлефонным інтэрвію.
Акрамя таго, ён адзначыў, што заходняя частка краіны традыцыйна «больш арыентаваная на Эўропу, больш арыентаваная на Захад, тады як насельніцтва ўсходу, прынамсі ў нейкай ступені, больш арыентаванае на Расею».
Тым ня менш, паводле яго, апытаньне паказвае, што ў краіне ёсьць «яўная большасьць, якая падтрымлівае барацьбу да перамогі».
ГЛЯДЗІЦЕ ТАКСАМА:
70% амэрыканцаў лічаць, што ЗША павінны падтрымліваць Украіну, нягледзячы на ядзерныя пагрозы РасеіГЛЯДЗІЦЕ ТАКСАМА:
Маск адказаў Зяленскаму, што падтрымлівае Ўкраіну, але супраць «маштабнай эскаляцыі»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.