Пра гэта паведамляюць расейскія інфармацыйныя агенцтвы.
Грамадзян Швэцыі, Харватыі і Вялікай Брытаніі — Матыяса Густаўсана, Векаслава Прэбэга і Джона Гардынга — абвінавачваюць ва ўдзеле ў якасьці наймітаў «у ваенных дзеяньнях і навучаньні для гвалтоўнага захопу ўлады». Ім пагражае сьмяротнае пакараньне.
Яшчэ двум грамадзянам Вялікай Брытаніі — Эндру Гілу і Дылану Гілі — выставілі абвінавачаньне ва ўдзеле ў ваенных дзеяньнях і ў вэрбаваньні наймітаў адпаведна.
Згодна з Крымінальным кодэксам самаабвешчанай «ДНР» , Гілу пагражае да сямі гадоў пазбаўленьня волі. Гілі — да васьмі.
Ніхто з іншаземцаў не пагадзіўся з агучанымі абвінавачаньнямі.
Наступнае паседжаньне адбудзецца ў кастрычніку.
ГЛЯДЗІЦЕ ТАКСАМА: «Фіктыўны прысуд», — у Вялікай Брытаніі і ЗША пракамэнтавалі сьмяротны вырак у самаабвешчанай «ДНР» брытанскім добраахвотнікам9 чэрвеня так званы «вярхоўны суд» самаабвешчанай «ДНР» асудзіў грамадзян Вялікай Брытаніі Шона Пінэра і Эйдэна Асьліна і грамадзяніна Марока Саадуна Брагіма на сьмерць. Яны служылі ў 36-й асобнай брыгадзе марской пяхоты Ўзброеных сіл Украіны і былі ўзятыя ў палон у Марыюпалі. Усе трое пераехалі ва Ўкраіну задоўга да пачатку расейскага збройнага ўварваньня і ўжо некалькі гадоў служылі ў марской пяхоце УСУ на кантракце.
Суд у Данецку доўжыўся ўсяго два дні.
Ні адна краіна, акрамя Расеі, КНДР і Сірыі не прызнае незалежнасьць «ДНР» і, такім чынам, правамоцнасьць суда самаабвешчанай рэспублікі.
ГЛЯДЗІЦЕ ТАКСАМА: У ЗША сочаць за лёсам вэтэранаў сваёй арміі, якія, імаверна, трапілі ў расейскі палон ва ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.