Карэспандэнту «Важных историй» удалося пацьвердзіць асобы мінімум чатырох салдат брыгады — адзін зь іх, Данііл Фролкін, прызнаўся ў забойстве жыхара Андрэеўкі Руслана Ярамчука.
У Андрэеўцы расейскія вайскоўцы знаходзіліся з канца лютага да пачатку красавіка. Пасьля іх адступленьня, паводле слоў відавочцаў, у вёсцы засталіся сотні разбураных і разрабаваных дамоў, больш за дзясятак целаў забітых мірных жыхароў, а таксама 25 фатаграфій, зробленых на скрадзены тэлефон аднаго з жыхароў вёскі.
На тых фота журналісты апазналі чатырох вайскоўцаў 64-й брыгады з Хабараўску: Данііла Фролкіна, Дзьмітрыя Данілава, Руслана Глотава і Івана Шапяленку. Многія жыхары Андрэеўкі прыгадалі салдат з гэтых здымкаў і расказалі пра іх дачыненьне да рабункаў, марадэрства і забойстваў.
ГЛЯДЗІЦЕ ТАКСАМА:
Ва Ўкраіне паўторна правяраюць факт службы ў расейскіх войсках беларуса Сяргея Калацэя, якога падазраюць у забойствах у БучыФролкін паведаміў выданьню, што камандаваньне [камандзіры 64-й мотастралковай брыгады — Азатбек Амурбекаў, Сяргей Дзьмітрэнка, Вячаслаў Клабукоў, Дзяніс Раманенка, Андрэй Пракурат] загадала яму і яшчэ некалькім калегам правесьці ператрусы ў дамах траіх жыхароў Андрэеўкі.
«Мы завялі іх у тры дамы, яны паказалі дамы. У дамах былі ня іх фатаграфіі. Гэта значыць, гэта ня іх дамы былі па факце. Трэці наогул у разваліне ў нейкай жыў. Пры іх быў пачак грошай: грыўны, баксы, усякая х****я. Падпалкоўнік, які быў з намі, Аляксандар Пракурат, забраў гэтыя грошы сабе, а астатняе — дакумэнты, тэлефоны — аддаў нам і сказаў: „Іх у расход“. Усё, я пайшоў і [аднаго зь іх] пусьціў у расход», — пад відэазапіс паведаміў Фролкін.
Пазьней Фролкін апазнаў па фота ахвяру і пацьвердзіў, што стрэліў у патыліцу Руслану Ярамчуку. Удава пацьвердзіла характар раненьня. Па дэталях з апавяданьня Фролкіна можна зрабіць выснову, што ў той жа дзень, 12 сакавіка, разам зь Ярамчуком расейскія вайскоўцы забілі яшчэ мінімум дваіх жыхароў Андрэеўкі — Вадзіма Ганюка і Віталя Кібукевіча.
ГЛЯДЗІЦЕ ТАКСАМА:
Лаўроў у інтэрвію ВВС: «Расея не ўрывалася ва Ўкраіну. Нам ня сорамна паказваць сябе такімі, якія мы ёсьць»У чэрвені генпракурор Украіны Ірына Венядзіктава абвінаваціла дзевяць вайскоўцаў з Тувы ў забойствах мірных жыхароў у вёсцы Ягаднае Чарнігаўскай вобласьці. Усе вайскоўцы са сьпісу — службоўцы расейскай вайсковай часткі № 55115. Паводле дадзеных генпракурора, яны маюць дачыненьне да катаваньняў і забойстваў цывільных асобаў.
Украіна завяла дзясяткі крымінальных спраў аб парушэньні законаў і звычаяў вайны. Першага асуджанага — іркуцкага вайскоўца Вадзіма Шышымарына — прыгаварылі да пажыцьцёвага зьняволеньня за забойства мірнага жыхара. У канцы чэрвеня апэляцыйны суд зьмякчыў яму пакараньне.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.