«Усе масты, якія вядуць да абласнога цэнтру, зьнішчаныя. Эвакуацыя і падвоз гуманітарных грузаў немагчымыя», — заявіў Сяргей Гайдай.
Паводле яго, расейскія войскі мэтанакіравана абстрэльваюць шматпавярховыя будынкі і завод «Азот».
«Ёсьць мэтанакіраванае пападаньне ў аб’екты севераданецкіх „Азоту“ і заводу „Склопластик“. Зруйнавалі мост, памяшканьні службы надзвычайных сытуацый, абстралялі навакольныя паселішчы Сінецкі і Паўлаград. Кожны дзень атрымліваем зьвесткі аб загінулых, да якіх праз шчыльныя абстрэлы цяжка дабрацца. Шмат пашкоджаных шматпавярховікаў у старых раёнах Севераданецку, некаторыя зь іх расейская армія расстрэльвала так, каб зьнесьці да самага падмурку. Аднак наступленьне ў раёне Мяцёлкіна ў іх не ўдалося», — дадаў Сяргей Гайдай.
У сваю чаргу кіраўнік Севераданецкай гарадзкой цывільна-вайсковай адміністрацыі Аляксандар Струк запэўніў, што, нягледзячы на разбураныя масты, шляхі зносін з горадам існуюць і горад пакуль не заблякаваны.
Сяргей Гайдай
«Масаванымі абстрэламі разбурылі трэці мост, але горад не адрэзаны, ёсьць хоць і дастаткова складаныя, але шляхі зносін з горадам маюцца. Горад працягваюць абараняць украінскія вайскоўцы», — паведаміў Аляксандар Струк у эфіры ўсеўкраінскага тэлемаратону #UAРазом.
Паводле яго, у бомбасховішчах заводу «Азот» знаходзіцца больш за 500 цывільных грамадзян.
«Вораг практычна на часткі разьбірае наша найбуйнейшае прадпрыемства. Ідуць вулічныя баі. Тактычна недзе нашыя Ўзброеныя сілы адкідаюць ворага, недзе расейцы, дзякуючы штурму і вялікай жывой сіле, спрабуюць адкінуць нашыя войскі. Сытуацыя мяняецца кожную гадзіну», — дадаў ён.
ГЛЯДЗІЦЕ ТАКСАМА:
«Тут стаіць смурод сьмерці». Мэр Марыюпалю расказаў, як выглядае пры акупацыі горад і як там жывуць людзі. ФОТАСевераданецк пасьля акупацыі ў 2014 годзе Луганску выконвае функцыі цэнтру Луганскай вобласьці. Да пачатку актыўных баявых дзеяньняў украінскія ўлады заклікалі грамадзян тэрмінова эвакуавацца.
Да вайны насельніцтва Севераданецку складала амаль 130 тысяч грамадзян розных нацыянальных груп. Беларусы займалі трэцяе месца па колькасьці (0,7%) пасьля ўкраінцаў (70,2%) і расейцаў (26,9%).
Горад лічыцца цэнтрам хімічнай прамысловасьці, найбуйнейшымі прадпрыемствамі якой зьяўляюцца заводы «Азот» і «Склопластик».
ГЛЯДЗІЦЕ ТАКСАМА:
Баі за Севераданецк, расейцы рыхтуюцца да наступу на Славянск. 111-ы дзень вайны Расеі супраць УкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.