«Мы прынялі такую кансалідаваную пазыцыю, што нашым украінскім сябрам трэба прапанаваць працу», — заявіў Раман Галоўчанка.
Паводле яго, за першы месяц пасьля пачатку вайны ў Гомельскай і Берасьцейскай абласьцях пачалі працаваць каля 700 украінскіх уцекачоў.
Як паведаміў Раман Галоўчанка, у першы час «мы іх кармілі 3–4 разы на дзень, а гэта ўсё вымяраецца ў грашах, гэта ўсе дзяржаўныя выдаткі». Пазьней, паводле слоў чыноўніка, «уцекачам было сказана: трэба працаваць».
«Акуратна ім гаворым: злоўжываць гасьціннасьцю таксама ня варта. Мы вас прынялі, трэба карміць сябе, калі вы людзі здаровыя. І гэта падзейнічала. Нікога не прымушалі, людзі самі ўсё разумеюць», — сказаў Раман Галоўчанка.
ГЛЯДЗІЦЕ ТАКСАМА:
Ва Ўкраіну вярнуліся больш за мільён уцекачоўПа словах прэм’ера, пры падборы варыянтаў занятасьці былі вывучаны вакансіі на рынку працы ў памежных раёнах. Частка ўкраінцаў атрымалі працу ў адпаведнасьці зь іх кваліфікацыяй. Працу знайшлі і ўцекачам, якія ня маюць спэцыяльных навыкаў.
Як адзначыў кіраўнік ураду, у ліку перасяленцаў, якія маюць кваліфікацыю, у Беларусі апынуліся людзі розных прафэсій — лекары, мэдсёстры, настаўнікі. У выпадку адсутнасьці пацьвярджальных дакумэнтаў іх прафэсійную падрыхтоўку вэрыфікавалі, пасьля чаго «ў выключным парадку» давалі працу па спэцыяльнасьці.
Галоўчанка заявіў, што прадастаўленьне працы ўцекачам было выклікана тым, каб «паказаць чалавечнасьць беларускай палітыкі ў адносінах да гэтых людзей».
«Мы ставімся да іх прыкладна так, як да сябе. У нас няма рэзэрвацый, як на Захадзе, няма нейкіх жорсткіх умоў. Мы не ставімся да іх як да людзей другога гатунку», — сказаў ён.
ГЛЯДЗІЦЕ ТАКСАМА:
Страты большыя, чым у вайне ў Афганістане, 6,5 млн уцекачоў. Вайна ва Ўкраіне ідзе тры месяцыПры гэтым Галоўчанка не назваў колькасьць украінскіх грамадзян, якія пасьля пачатку вайны прыбылі на тэрыторыю Беларусі, адзначыўшы толькі, што «ў першы месяц канфлікту паток быў вельмі інтэнсіўны».
Паводле зьвестак ААН на 22 траўня, з пачатку вайны Ўкраіну пакінулі 6 млн 553 тысячы чалавек. У Польшчу зьехалі 3 млн 506 тысяч украінскіх грамадзян, у Румынію — 961 тыс., Расею — 920 тыс., Вугоршчыну — 644 тыс., Малдову — 471 тыс., Славаччыну — 442 тыс.
Паводле інфармацыі Дзяржаўнага памежнага камітэту, Беларусь прыняла 28 494 грамадзяніна Ўкраіны.
ГЛЯДЗІЦЕ ТАКСАМА:
ААН: колькасьць уцекачоў у сьвеце ўпершыню перавысіла 100 мільёнаўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.