Выданьне Zerkalo.io зьвярнулася ва ўкраінскую пракуратуру, каб удакладніць, ці сапраўды Калацэй датычны да забойстваў мірных жыхароў у Бучы, што пад Кіевам.
«У нас дастаткова доказаў для таго, каб падазраваць гэтую асобу ў інкрымінаваных яму злачынствах. Дасудовае расьсьледаваньне працягваецца, — растлумачылі ў прэс-службе пракуратуры Кіеўскай вобласьці. — Выдаваньне іншых зьвестак, згодна з арт. 222 КПК Украіны, немагчыма, бо гэта можа нашкодзіць сьледзтву».
Таксама выданьне ўдакладніла ў пракуратуры Кіеўскай вобласьці, чаму, калі расьсьледаваньне яшчэ працягваецца, імя падазраванага было названа. Адказ на пытаньне журналістам параілі шукаць у брыфінгу Генпракурора Украіны Ірыны Венядзіктавай, які прайшоў 4 траўня.
Яна патлумачыла тое, што адбылося, сказаўшы, што ёсьць неабходныя доказы:
«Мы будзем іх паказваць. Калі мы разумеем, што правялі ўсе неабходныя працэсуальна-сьледчыя дзеяньні і ў нас ёсьць усе законныя і абгрунтаваныя падставы пачынаць падазраваць канкрэтных расейскіх вайскоўцаў, якія тут забівалі, катавалі, гвалтавалі, мы будзем абавязкова апублічваць іх фота і дадзеныя, каб іншыя ахвяры, якія, ня дай Бог, таксама былі ў іхных лапах, маглі нам [пра гэта] паведамляць. Гэта з аднаго боку. А з другога, няхай гэтыя нелюдзі і іншыя, якія зараз ваююць у іншых частках нашай краіны, ведаюць, што мы кожнага вызначым, віну кожнага дакажам і будзем прыцягваць кожнага да адказнасьці. Бо асноўнае, што робіць іх такімі жорсткімі, гэта беспакаранасьць. А беспакаранасьці ня можа быць у сучасным сьвеце».
ГЛЯДЗІЦЕ ТАКСАМА:
«Прашу вас, спыніцеся!» Жыхар Мазыра сьцьвярджае, што ён не ваенны злачынецПадчас прэс-канфэрэнцыі Генэральнага пракурора таксама папрасілі пракамэнтаваць сытуацыю з падазрэньнем, якое было выстаўлена ўраджэнцу Мазыра.
«Мы выдатна разумелі, хто ў нас будзе гэты падазраваны, — адказала Ірына Венядзіктава. — Мы вельмі старанна да гэтага падыходзілі. Так, у яго такое грамадзянства, што ж з гэтым зробіш. Але, у прынцыпе, гэта ж не пытаньне, хто ў вайсковым войску краіны-агрэсара зь якім грамадзянствам ваюе. Гэта пытаньне да краіны-агрэсара. Да нас пытаньне, ці ёсьць у нас дастаткова доказаў, што гэты чалавек, зьяўляючыся вайскоўцам Расейскай Федэрацыі, забіваў (у нас ёсьць законныя і аргумэнтаваныя падставы лічыць, што ён забіў чатырох чалавек і катаваў як мінімум аднаго чалавека). У нас, дзякуй Богу, ёсьць людзі, якія могуць даваць паказаньні. Таму ў гэтым выпадку грамадзянства Беларусі... Ну што ж, такое таксама бывае. Але гэта не азначае, што мы ня будзем працягваць прыцягваць да адказнасьці».
Раней украінскае выданьне «Слідство.Інфо» паведаміла, што падазраваны Сяргей Калацэй нарадзіўся і вырас у беларускім горадзе Мазыры. Доўгі час займаўся адзінаборствамі, выступаў на спаборніцтвах. У сваіх сацыяльных сетках паказвае, што затым пераехаў у Расею.
Сам Калацэй адмаўляе сваю віну, пра што заявіў выданьню «Можем объяснить».
«Я не служу ў Нацгвардыі. Вы што, з глузду зьехалі?» — заявіў ён.
Ён кажа, што ён не грамадзянін Расеі, мае толькі пашпарт Рэспублікі Беларусь, дзе цяпер і знаходзіцца. Мужчына адмаўляе, што апошнім часам наведваў Украіну.
ГЛЯДЗІЦЕ ТАКСАМА:
Ва Ўкраіне назвалі першага падазраванага ў забойствах у Бучы — расгвардзейца, які паходзіць з Мазыра. Ён усё адмаўляеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.