Паводле крыніц The New York Times сярод высокапастаўленых заходніх чыноўнікаў, краіны Балтыі і Польшча настойваюць на поўным разрыве адносін з Масквой і мерах, якія б «паставілі Расею на калені». Яны баяцца, што ўсё, што Расея можа падаць як перамогу, нанясе сур’ёзную шкоду эўрапейскай бясьпецы.
У той жа час Францыя, Нямеччына і Турэччына хочуць працягваць падтрымліваць кантакты з Уладзімірам Пуціным, нягледзячы нават на абвінавачаньні ў ваенных злачынствах, выстаўленых супраць расейскага войска.
ГЛЯДЗІЦЕ ТАКСАМА:
ЗША і Вялікая Брытанія патрабуюць выключэньня Расеі з G20 і Рады правоў чалавека ААН6–7 красавіка ў Бруселі праходзіць сустрэча міністраў замежных спраў краін NATO. Кіраўнік МЗС Вялікай Брытаніі Ліз Трас заявіла, што асноватворны акт аб супрацоўніцтве Расеі з NATO цяпер ужо неактуальны, «яго дні прайшлі».
Раней Генэральны сакратар NATO Енс Столтэнбэрг, камэнтуючы сытуацыю ў зоне баявых дзеяньняў, заявіў, што вайна ва Ўкраіне ўваходзіць у «крытычную фазу». Паводле зьвестак Паўночнаатлянтычнага альянсу, Расея рыхтуецца заваяваць Данбас і стварыць наземны калідор да Крыму.
ГЛЯДЗІЦЕ ТАКСАМА:
За два дні пасьля Бучы з краінаў ЭЗ выслалі больш за 200 расейскіх дыпляматаў. Агулам іх ужо 325 ад пачатку вайныТым часам кіраўнік МЗС Украіны Дзьмітро Кулеба заклікаў краіны NATO перадаць Украіне ўсю неабходную зброю для перамогі над пуцінскай арміяй, паведамляе агенцтва УНІАН.
Аб гэтым Кулеба сказаў на сумесным брыфінгу з Генэральным сакратаром NATO Енсам Столтэнбэргам у Бруселі.
«Я прыбыў у Брусэль для ўдзелу ў міністэрскай сустрэчы NATO і правядзеньня двухбаковых сустрэч з саюзьнікамі. Мой парадак дня вельмі просты. У ім усяго тры пункты: гэта зброя, зброя і зброя», — заявіў Кулеба.
ГЛЯДЗІЦЕ ТАКСАМА:
ЗША абвясьцілі пра новыя санкцыі супраць найбуйнейшых банкаў, інвэстыцый у Расею і расейскіх эліт«Мы ўпэўненыя, што найлепшы спосаб дапамагчы Ўкраіне цяпер — гэта даць усё неабходнае, каб стрымаць Пуціна і нанесьці паражэньне расейскай арміі на тэрыторыі Ўкраіны дзеля таго, каб вайна не распаўсюдзілася далей», — сказаў міністар.
Ён дадаў, што ў апошнія тыдні ўкраінскае войска і народ прадэманстравалі, што ведаюць, як ваяваць і перамагаць, але без устойлівых і дастатковых паставак усіх відаў узбраеньняў, пра якія Ўкраіна просіць, гэтыя перамогі будуць суправаджацца вялізнымі ахвярамі.
«Чым больш узбраеньняў мы будзем атрымліваць і чым хутчэй яны прыбудуць ва Ўкраіну, тым больш чалавечых жыцьцяў будзе захавана, тым больш гарадоў і вёсак ня будуць разбураныя, і больш ня будзе Бучаў», — падкрэсьліў Кулеба.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.