Агрэсія Расеі супраць Украіны актывізавала новую хвалю пераходу цэркваў, што належалі да Расейскай праваслаўнай царквы ва Ўкраіне (РПЦ), у Праваслаўную царкву Ўкраіны, якая тры гады таму атрымала томас аб аўтакефаліі.
За тры гады ў Праваслаўную царкву Ўкраіны перайшлі амаль 700 парафій, якія дзейнічалі ў складзе РПЦ ва Ўкраіне.
Кіраўніка РПЦ Кірыла больш ня згадваюць на літургіях
Пасьля ўварваньня Расеі на тэрыторыю Ўкраіны кіраўнік Праваслаўнай царквы Ўкраіны, Мітрапаліт Кіеўскі і ўсяе Ўкраіны Эпіфаній перастаў згадваць імя патрыярха Расейскай праваслаўнай царквы Кірыла ў часе богаслужбаў.
Згадваньне кіраўнікоў памесных праваслаўных цэркваў адпаведна іхнаму месцу ў дыптыху (пераліку імёнаў, якія згадваюцца ў часе літургій у хрысьціянскіх цэрквах. — РС) ёсьць адной з ключавых асаблівасьцяў царкоўных дачыненьняў паміж імі. Першы ў дыптыху — Усяленскі Патрыярх, Праваслаўная царква Ўкраіны — на 15-м месцы.
Пасьля таго, як патрыярх Кірыл падтрымаў вайну ва Ўкраіне, у рэлігійных грамадах яго лічаць саўдзельнікам ваеннага злачынства.
Цэрквы разрываюць дачыненьні з Маскоўскім патрыярхатам
Чырвонаград на Львоўшчыне, Дзяньгі на Чаркашчыне, Стараканстанцінаўка на Хмяльніччыне, Крамянец на Валыні, Вішнёвае на Кіеўшчыне, Львоў — няпоўны пералік мясцовых рэлігійных супольнасьцяў, якія ўжо ўхвалілі рашэньне аб далучэньні да Праваслаўнай царквы Ўкраіны (ПЦУ).
Настаяцель Сьвята-Андрэеўскай царквы ў Стараканстанцінаўцы айцец Ермаген ня толькі заявіў пра пераход у ПЦУ, а і заклікаў усіх сьвятароў, якія служаць у Маскоўскім патрыярхаце, зрабіць тое самае. У сваіх літургіях ён перастаў згадваць ня толькі імя патрыярха Кірыла, але і кіраўніка РПЦ ва Ўкраіне Ануфрыя.
На Валыні настаяцель Сьвята-Мікалаеўскай царквы ў Крамянцы запісаўся ў мясцовае падразьдзяленьне тэрытарыяльнай абароны, якое ён у якасьці валянтэра забясьпечвае харчамі.
На Цярнопальшчыне ў Пачаеўскай лаўры, якая лічыцца ва Ўкраіне найбольшым пасьля Кіева-Пячэрскай лаўры асяродкам Маскоўскага патрыярхату, пачалі зьбіраць подпісы за выхад з РПЦ. Але перад гэтым намесьнік лаўры мітрапаліт Пачаеўскі Ўладзімір зьвярнуўся да патрыярха Кірыла, каб той заклікаў улады Расеі спыніць ваенныя дзеяньні ва Ўкраіне.
Кіраўнік РПЦ ва Ўкраіне застаецца верным Маскоўскаму патрыярхату
Кіраўнік РПЦ ва Ўкраіне мітрапаліт Ануфрый імкнецца пераканаць украінскае грамадзтва ў тым, што гэтая царква — царква ўкраінскага народу, якая аб’ядноўвае вернікаў на ўсходзе, захадзе, поўначы і поўдні Ўкраіны. Ён заклікаў дапамагчы арганізаваць гуманітарныя калідоры і абмен ваеннапалоннымі.
«Усе мы адно ў Хрысьце. За больш чым тысячагадовую гісторыю наша Царква заўсёды была і застаецца са сваім народам», — заявіў ён.
На афіцыйным сайце РПЦ ва Ўкраіне цяпер шмат інфармацыі аб тым, як сьвятары і цэрквы Маскоўскага патрыярхату дапамагаюць цывільнаму насельніцтву і асабліва дзецям.
Пры гэтым усё часьцей ухвальваюць рашэньні аб «адлучэньні ад царквы» тых сьвятароў, якія разам са сваімі вернікамі цяпер пераходзяць у Праваслаўную царкву Ўкраіны.
ГЛЯДЗІЦЕ ТАКСАМА:
Патрыярх РПЦ Кірыл перадаў кіраўніку Расгвардыі абраз, а той прызнаў, што ва Ўкраіне ў іх «ўсё ідзе ня так хутка, як хацелася б»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.