Паводле папярэдняй інфармацыі, часткова зьнішчылі або пашкодзілі 12 рэлігійных цэнтраў:
- пашкодзілі фасады і вокны помнікаў архітэктуры — будынкаў, якія ўваходзяць у архітэктурны манастырскі ансамбль Сьвятагорскай Сьвята-Ўсьпенскай лаўры ХІХ — пачатку ХХ стагодзьдзя (Данецкая вобласьць);
- часткова пашкодзілі Сьвята-Пакроўскую царкву ў горадзе Малін Жытомірскай вобласьці;
- часткова зьнішчылі помнік гісторыі — драўляную Пакроўскую царкву Нараджэньня Прасьвятой Багародзіцы, пабудаваную ў 1862 годзе ў сяле Вязаўка Жытомірскай вобласьці;
- часткова зруйнавалі царкву ў гонар сьвятога Ціхана Задонскага ў горадзе Гуляйполе Запароскай вобласьці;
- чатыры царквы ў населеных пунктах Кіеўскай вобласьці — у Бобрыку, Заворычах, Бучы і Іванкаве;
- пяць цэркваў у Харкаўскай вобласьці (чатыры ў Харкаве і адну ў Ізюме).
Пазьней Дзяржаўная служба Ўкраіны ў пытаньнях этнапалітыкі і свабоды слова ўдакладніла, што ад расейскіх абстрэлаў пацярпелі 28 культавых устаноў, у тым ліку сынагога ў Харкаве, якая на пачатку ХХ стагодзьдзя была найбольшай у Эўропе, а таксама Канстанцінаўская мячэць у Данецкай вобласьці.
Сьпікер Праваслаўнай царквы Ўкраіны архіяпіскап Яўстраці Зара перакананы, што расейскія войскі наўмысна абстрэльваюць украінскія храмы.
ГЛЯДЗІЦЕ ТАКСАМА:
Патрыярх РПЦ Кірыл перадаў кіраўніку Расгвардыі абраз, а той прызнаў, што ва Ўкраіне ў іх «ўсё ідзе ня так хутка, як хацелася б»«Ня толькі храмы; мы ведаем і пра малітоўныя дамы пратэстанцкіх канфэсій, мы ведаем пра абстрэлы, бамбаваньне мячэці, якая знаходзіцца ў Марыюпалі, дзе ў падвале хаваліся больш за 80 чалавек. Пашкодзілі або разбурылі шэраг храмаў, у тым ліку храмы розных канфэсій — Праваслаўнай царквы Ўкраіны і Маскоўскага патрыярхату. Я думаю, што самым вядомым быў Сьвятагорскі манастыр пад Славянскам. Гэты манастыр быў вядомы сваёй асаблівай прыхільнасьцю да еднасьці з Расейскай праваслаўнай царквой. То бок гэта рэчы, якія выходзяць за рамкі любой лёгікі», — сказаў Яўстраці Зара ў інтэрвію праекту Радыё Свабода «Навіны Прыазоўя».
Яўстраці Зара таксама паведаміў, што ў акупаваным Бярдзянску расейскія вайскоўцы затрымалі і вывезьлі ў невядомым кірунку сьвятара Праваслаўнай царквы Ўкраіны айца Алега Нікалаева. Яшчэ аднаго сьвятара, што быў з камандай цывільнага карабля «Сапфір», захапілі ў палон і разам з экіпажам вывезьлі ў Крым.
«Я таксама ведаю, што ў некаторых гарадах Чарнігаўскай вобласьці прыяжджалі людзі, якія выглядалі як прадстаўнікі расейскіх спэцслужбаў, яны прыяжджалі на машынах з расейскімі нумарамі і шукалі сьвятара Праваслаўнай царквы Ўкраіны, які да акупацыі быў вядомы сваёй праўкраінскай патрыятычнай пазыцыяй», — дадаў сьпікер Праваслаўнай царквы Ўкраіны.
Пералічаныя злачынствы ўжо задакумэнтаваныя, але імаверна, што іх колькасьць насамрэч значна большая.
«Духоўнае злачынства»: у ПЦУ асудзілі дзеяньні патрыярха РПЦ, які перадаў абраз кіраўніку Расгвардыі
Мітрапаліт Кіеўскі і ўсяе Ўкраіны Эпіфаній асудзіў дзеяньні патрыярха Рускай праваслаўнай царквы Кірыла (Гундзяева), які 13 сакавіка перадаў ікону Віктару Золатаву, кіраўніку Расгвардыі.
«Уручэньне ў нядзелю на літургіі кіраўніком Маскоўскага патрыярхату Кірылам Гундзяевым кіраўніку Расгвардыі абраза і пажаданьні «дабраславеньня» забойцам і душагубам — духоўнае злачынства. Пазыцыю кіраўніка РПЦ, які падтрымаў агрэсію супраць Украіны, павінны асудзіць усе рэлігійныя лідэры сьвету!» — заявіў кіраўнік Праваслаўнай царквы Ўкраіны.
ГЛЯДЗІЦЕ ТАКСАМА:
Патрыярх РПЦ Кірыл перадаў кіраўніку Расгвардыі абраз, а той прызнаў, што ва Ўкраіне ў іх «ўсё ідзе ня так хутка, як хацелася б»ГЛЯДЗІЦЕ ТАКСАМА:
РПЦ у Амстэрдаме першай з заходніх цэркваў заявіла аб разрыве з Маскоўскім патрыярхатам праз вайну ва ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.