Галоўнае выведнае ўпраўленьне Міністэрства абароны Ўкраіны заявіла, што для вайны супраць Украіны кіраўніцтва Расеі вэрбуе наймітаў. Паводле зьвестак выведкі, Расея адкрыла ў Сырыі цэнтры вэрбаваньня на тэрыторыі, падкантрольнай рэжыму Башара Асада. Пасьля трэнаваньняў іх перавозяць у Расею самалёты Ту-134 і Ту-154. Раней праект Радыё Свабода «Схеми» пісаў пра палёты гэтых самалётаў з Сырыі ў Расею.
«Расея адкрыла 14 цэнтраў для вэрбаваньня наймітаў у Сырыі на тэрыторыях, якія кантралююцца рэжымам Асада (Дамаск, Алепа, Хама, Рака і Дэйр-эз-Зор). Пасьля кароткай падрыхтоўкі наймітаў даставяць у Расею з авіябазы Хмэймім на двух самалётах Ту-134 (да 80 пасажыраў) і Ту-154 (да 180 пасажыраў) на лётнішча «Чкалаўскі» Маскоўскай вобласьці, паінфармавала выведка ў Facebook.
Таксама ў міністэрстве дадалі, што ў апошнія дні Расея сабрала тысячы сырыйскіх наймітаў, каб папоўніць імі акупацыйныя войскі. У прыватнасьці, гэта чальцы так званага «Апалчэньня нацыянальнай абароны» і падразьдзяленьняў 5-га корпусу Ўзброеных сіл Сырыі.
«Чакаецца, што сырыйцы ўжывуць супраць украінцаў цяжкую артылерыю і снайпэрскае ўзбраеньне», — дадалі ў міністэрстве.
Паводле выведкі, Расея будзе плаціць замежным наймітам штомесячны заробак ад 300 да 600 даляраў. Акрамя жыхароў Сырыі, расейцы вэрбуюць для вайны і жыхароў Лібіі.
ГЛЯДЗІЦЕ ТАКСАМА:
Пуцін дазволіў адпраўляць добраахвотнікаў з Блізкага Ўсходу ваяваць за «ДНР» і «ЛНР»Раней «Схеми» паведамлялі, што два самалёты ВПС РФ, два самалёты 223-га лётнага атраду Мінабароны РФ і адзін борт спэцыяльнага лётнага атраду «Расея» з моманту поўнамаштабнага расейскага ўварваньня ва Ўкраіну зьдзейсьнілі шэсьць палётаў у Сырыю і назад. Пазьней каля ўкраінскай мяжы былі заўважаныя два самалёты, якія зьніклі з радараў.
Раней The Wall Street Journal пісаў, што Расея вэрбуе сырыйцаў для вайны супраць Украіны. Выданьне адзначала, што расейскія ўлады шукаюць сырыйцаў, якія маюць вопыт вулічных баёў, спадзеючыся, што гэта дапаможа захапіць Кіеў. Экспэрты мяркуюць, што гэты крок можа сьведчыць аб эскаляцыі ваенных дзеяньняў, гаворыцца ў артыкуле WSJ.
«Расея была ключавым саюзьнікам прэзыдэнта Сырыі Башара Асада з моманту ўступленьня ў канфлікт, у асноўным праз удзел расейскіх сіл і авіяўдараў. «Група Вагнэра, якая прыбыла ў Сырыю неўзабаве пасьля ўступленьня Расеі ў баі на баку рэжыму Асада, правяла дапаможныя апэрацыі, такія як захоп радовішчаў нафты і газу і абарона іншай дзяржаўнай інфраструктуры, напрыклад, аэрапортаў», — дадала газэта.
Пазьней прэс-сакратар Пэнтагону Джон Кірбі заявіў CNN, што Расея вэрбуе замежных наймітаў для вайны ва Ўкраіне.
ГЛЯДЗІЦЕ ТАКСАМА:
Прымус да ўдзелу ў агрэсіі? Навошта Лукашэнку выклікалі ў МасквуГЛЯДЗІЦЕ ТАКСАМА:
«Расейская апэрацыя была непадрыхтаванай авантурай», — вайсковы экспэртВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.