Калі не прыняць тэрміновых мераў, да сакавіка ад каранавірусу могуць памерці яшчэ 500 тысяч чалавек, заявіў у інтэрвію ВВС рэгіянальны дырэктар Сусьветнай арганізацыі здароўя (САЗ) Ханс Клюге. «COVID-19 зноў стаў прычынай сьмяротнасьці нумар адзін у нашым рэгіёне», — сказаў ён.
Паводле Клюге, за распаўсюджваньнем каранавірусу стаяць такія фактары, як зімовы сэзон, недастатковы ахоп вакцынацыяй і рэгіянальнае дамінаваньне больш заразнага штаму «дэльта».
Сытуацыю, паводле яго, зможа палепшыць больш дбайнае выкананьне масачнага рэжыму і вакцынацыя, якая, на яго думку, пакуль ідзе недастатковымі тэмпамі. Клюге адзначыў, што абавязковую вакцынацыю трэба разглядаць як крайнюю меру, але пры гэтым ён лічыць, што было б своечасова зараз правесьці грамадзкія дэбаты на гэтую тэму.
«Да ўвядзеньня такой меры ёсьць і іншыя сродкі, напрыклад COVID-пропускі», — сказаў ён, дадаўшы, што гэта «не абмежаваньне свабоды, а інструмэнт для захаваньня нашай індывідуальнай свабоды».
Аўстрыя стала першай эўрапейскай краінай, якая 19 лістапада абвясьціла, што вакцынацыя супраць Covid-19 стане абавязковай.
ГЛЯДЗІЦЕ ТАКСАМА: Тысячы чалавек выйшлі на пратэсты ў Вене супраць абавязковай вакцынацыі ад COVID-19 ГЛЯДЗІЦЕ ТАКСАМА: У Нямеччыне антырэкорд: звыш 65 тысяч новых хворых на каранавірус за дзень ГЛЯДЗІЦЕ ТАКСАМА: У Беларусі зноў пайшоў прырост хворых на COVID-19 ГЛЯДЗІЦЕ ТАКСАМА: У Расеі новы максымум сьмерцяў ад COVID-19 за дзень