Гэта ў 26 разоў перавышае паказчык 2020 году, паведамляе памежная служба Літвы.

Толькі за ліпень на літоўскай мяжы затрымалі 1435 мігрантаў. У чэрвені — 473, у траўні — 77, у красавіку — 70, у сакавіку — 8.

Сярод іншаземцаў, затрыманых у выходныя, больш за ўсё грамадзян Іраку. Усяго з пачатку 2021 году літоўскія памежнікі затрымалі 1098 асобаў з гэтай краіны. Акрамя таго, затрымалі 179 грамадзян Конга, 121 — Камэруну, 78 — Гвінэі, 74 — Ірану ды іншых краін.

9 ліпеня Літва пачала мантаваць 550-кілямэтровую агароджу з калючага дроту на мяжы зь Беларусьсю, абвінаваціўшы беларускія ўлады ў тым, што яны пускаюць у краіну мігрантаў з-за мяжы, каб затым незаконна перапраўляць іх у Эўразьвяз. Агароджа на мяжы зь Беларусьсю, якую пачала рабіць Літва, будзе каштаваць ёй больш як 40 млн эўра.

Паводле кіраўніка літоўскага замежнапалітычнага ведамства Габрыелюса Ландсбергіса, цяпер Эўразьвяз разглядае магчымасьць скасаваньня шэнгенскага візавага рэжыму для Іраку, аднак гэта не зьвязана зь цяперашнім крызісам, рашэньне «даўно насьпявала».

Афіцыйная Вільня перакананая, што да мігранцкага крызісу непасрэдна датычныя беларускія ўлады. На гэта ў Менску і не пярэчаць, спасылаючыся на вымушанае скарачэньне выдаткаў на ахову мяжы ў зьвязку з заходнімі санкцыямі.
16 ліпеня міністар замежных спраў Літвы Габрыелюс Ландсбергіс, выступаючы на онлайн-дыскусіі, арганізаванай Атлянтычнай радай, заклікаў Эўразьвяз і ЗША ўзмацніць ціск на «незаконны рэжым» у Беларусі.