Беларуская фэдэрацыя футболу атрымала заяву, у якой адміністрацыя клюбу «Спадарожнік» з Рэчыцы паведаміла, што ў сувязі зь фінансавай сытуацыяй калектыў вымушаны спыніць удзел у чэмпіянаце краіны.
Сёлета «Спадарожнік» дэбютаваў у вышэйшай лізе, але так нічога і ня здолеў супрацьпаставіць супернікам — апошняе месца пасьля першага кругу першынства.
Празь фінансавыя праблемы каманду пакінула большая частка гульцоў, якія наракалі, што за прамінулы час толькі аднойчы атрымалі заробак. Вядома, што шэраг футбалістаў падалі ў суд на ўладальнікаў клюбу.
ГЛЯДЗІЦЕ ТАКСАМА: Зь лягатыпу дэбютанта найвышэйшай футбольнай лігі зьнікла ПагоняАдметна, што 1 чэрвеня два дзясяткі прадстаўнікоў «Спадарожніка» падпісалі праўладны ліст спартоўцаў, падзякаваўшы ўладам «за вялізную ўвагу, якую яны аддаюць спорту». Гэта быў самы шматлікі калектыўны подпіс.
Перад пачаткам першынства калектыў трапіў у скандал: з клюбнай эмблемы раптам зьнікла выява «Пагоні», якая ёсьць на гербе Рэчыцы. Пазьней гэта патлумачылі «рэбрэндынгам».
ГЛЯДЗІЦЕ ТАКСАМА: Кіраўнік Асацыяцыі футбалістаў Беларусі вымушана пакінуў краінуУ сэзоне 2021 году «Спадарожнік» згуляў 15 з 30 матчаў, то бок роўна палову. Згодна з рэглямэнтам чэмпіянату Беларусі, калі каманда правяла больш за 50% сустрэчаў, ёй залічваюцца паразы ў астатніх матчах 0:3, а ўсім супернікам прысуджаюцца перамогі з такім жа лікам.
Сытуацыя вакол «Спадарожніка» будзе разгледжана на бліжэйшым пасяджэньні выканкаму фэдэрацыі 28 ліпеня.