Ігара Лосіка затрымалі ў яго дома ў Баранавічах 25 чэрвеня 2020 году. Ад сярэдзіны жніўня Ігар знаходзіцца ў сьледчай турме № 8 Жодзіна. Жонка Ігара Дар’я Лосік некалькі разоў на тыдзень возіць мужу перадачы з Баранавічаў. Яна расказала пра апошнія навіны ад Ігара.
«Ігар па-ранейшаму ў Жодзіне, у яго нічога новага пакуль няма, — расказвае Дар’я Лосік. — Скардзіцца, што вельмі дрэнна ходзяць лісты. Ён іх практычна не атрымлівае. Чаму так, цяжка зразумець.
Яшчэ з навінаў тое, што мне адмовілі ў спатканьні зь ім. Я разьлічвала, што пасьля завяршэньня азнаямленьня з матэрыяламі справы змагу пабачыць Ігара. У суботу 24 чысла адправіла ліст сьледчаму, прасіла дазволіць сустрэчу. А сёньня вось атрымала адказ, што ў спатканьні мне адмоўлена. Чаму, невядома. Прычынаў гэтага не тлумачаць.
Лістоў я ад Ігара зараз таксама не атрымліваю. Чаму, незразумела. Гэта такія дробныя паскудзтвы. Яны, у прынцыпе, заўсёды былі».
ГЛЯДЗІЦЕ ТАКСАМА: Ігар Лосік скончыў знаёміцца з матэрыяламі справы. За кратамі палітвязень ужо 302 дніПаводле неафіцыйнай інфармацыі, судзіць Ігара Лосіка зьбіраюцца разам зь Сяргеем Ціханоўскім, Міколам Статкевічам і шэрагам іншых палітзьняволеных. Напрыканцы мінулага тыдня Ігар скончыў знаёміцца з матэрыяламі справы, аднак пакуль невядома, калі яна будзе перададзеная ў суд — іншыя абвінавачаныя пакуль працягваюць вывучэньне матэрыялаў.
Па розных зьвестках, гэтая крымінальная справа ўтрымлівае ад 150 да 170 тамоў. Працэс пачнецца, меркавана, на пачатку чэрвеня.
ГЛЯДЗІЦЕ ТАКСАМА: «Лісты ад Ігара часам нават цяжка чытаць». Палітвязень Лосік за кратамі 288 дзён ГЛЯДЗІЦЕ ТАКСАМА: 170 тамоў, шасьцёра абвінавачаных. Што вядома пра справу, па якой будуць судзіць Лосіка, Статкевіча і Ціханоўскага