Лінкі ўнівэрсальнага доступу

«Лісты ад Ігара часам нават цяжка чытаць». Палітвязень Лосік за кратамі 288 дзён


Партрэт Ігара Лосіка на офісе літоўскай дэлегацыі ў Эўразьвязе, Брусэль

Кансультант Радыё Свабода і блогер працягвае знаёміцца з матэрыяламі справы.

Ігара Лосіка затрымалі 25 чэрвеня 2020 году, ён за кратамі ўжо 288 дзён.

Жонка Ігара Дар’я Лосік расказала Свабодзе, што на мінулым тыдні нарэшце атрымала ад мужа пошту, упершыню з пачатку сакавіка. У пятніцу 9 красавіка яна чарговы раз адвезла Ігару перадачу.

«Ігар нармальна, — расказвае Дар’я. — З навінаў у нас толькі тое, што я на гэтым тыдні ад яго атрымала восем лістоў. У аўторак было шэсьць адразу, учора яшчэ два. Перадачы прымаюць, ён знаёміцца з матэрыяламі справы. Даты суду, альбо яшчэ нечага, пакуль мы ня ведаем. Нічога зусім. Гэта ўсё, у прынцыпе. Вось толькі лісты з навінаў. Ён таксама цяпер атрымлівае ад усіх лісты».

Па словах Дар’і, лісты Ігару прыносяць ад розных людзей, у тым ліку атрымаў на тыдні ліст ад маці. Сам ён жонцы піша пра розныя рэчы. Дар’я прызнаецца, што лісты ад мужа прыходзяць розныя. Часам іх цяжка чытаць.

«Лісты розныя, адзін ад аднаго адрозьніваюцца, бывае, — расказвае Дар’я. — Адзін можа быць пазытыўны, іншы не. У адным зь лістоў Ігар апісаў лепшыя моманты нашага жыцьця зь ім. А іншы ліст дастаткова пэсымістычны. Піша, што стаміўся, што невядома, калі гэта скончыцца, ня можа зразумець, у чым ён вінаваты. Такія эмацыйныя арэлі ў Ігара. Часам бывае цяжкавата чытаць нават».

Па словах Дар’і Лосік, знаёмства з матэрыяламі справы ў мужа можа працягнуцца да канца месяца. Затым справу перададуць у пракуратуру і суд. Працэс можа пачацца ў канцы траўня альбо на пачатку чэрвеня.

Крымінальны перасьлед Ігара Лосіка

На адміністратара суполкі «РБ головного мозга» і фрылансэра-кансультанта Радыё Свабода Ігара Лосіка завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).

Лосіка затрымалі 25 чэрвеня 2020 года пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.

Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.

15 сьнежня пасьля выстаўленьня другога абвінавачаньня Ігар Лосік абвясьціў галадоўку пратэсту і трымаў яе да 25 студзеня.

11 сакавіка 2021 года Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.

Па якім артыкуле Лосіку выставілі новыя абвінавачаньні, невядома. Ягоны адвакат Дзьмітрый Лепрэтар пад падпіскай аб неразгалошваньні.

Дома Ігара чакаюць жонка і двухгадовая дачка. Жонка прыяжджала да месца закрытага суду і дзяжурыла каля будынку, нават ня маючы шанцаў зайсьці і пабыць на працэсе.

14 сьнежня ў будынку СІЗА-3 ў Гомлі судзьдзя Мікалай Доля вынес выракі 6 падсудным:

  • Ігару Лосіку прысудзілі 15 гадоў зьняволеньня,
  • Арцёму Сакаву — 16 гадоў,
  • Міколу Статкевічу — 14 гадоў,
  • Дзьмітрыю Папову — 16 гадоў,
  • Сяргею Ціханоўскаму — 18 гадоў,
  • Уладзімеру Цыгановічу — 15 гадоў зьняволеньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG