BYPOL апублікаваў сьпіс тых, хто служыць у менскім АМАПе. МУС адказвае на такое крымінальнымі справамі

Сьпіс — пералік 559 супрацоўнікаў з указаньнямі іх хатніх адрасоў, званьняў і пасадаў, ад камандзіра атраду да міліцыянта-кіроўцы.

У дакумэнце раскрылі значэньне нумарных нашывак на рыштунку амапаўцаў, што дае магчымасьць па шматлікіх відэа- і фотаматэрыялах устанавіць датычнасьць да злачынных дзеяньняў асобаў з канкрэтнага ўзводу (роты) названага падразьдзяленьня.

Як пішуць аўтары дасьледвання, узвод звычайна складаецца з 10-20 супрацоўнікаў, што істотна звужае поле пошуку вінаватых і дазваляе ідэнтыфікаваць калі не выканаўцу, то, як мінімум, яго саўдзельніка альбо супрацоўніка, які можа выступіць сьведкам і паказаць на тых сваіх таварышаў па службе, якія парушылі закон. У выпадку адмовы ён сам будзе несьці крымінальную адказнасьць паводле арт. 406 Крымінальнага Кодэксу «Неданясеньне аб злачынстве».

Напярэдадні афіцыйная прадстаўніца МУС Вольга Чамаданава заявіла, што пасьля прэзыдэнцкіх выбараў устаноўлена больш за 18 тысяч выпадкаў разгалошваньня пэрсанальных зьвестак сілавікоў і 92 факты паклёпу на іх.

У ведамстве падлічылі іх колькасьць за пяць апошніх месяцаў — у адрас супрацоўнікаў органаў унутраных спраў і ўнутраных войскаў, а таксама чальцоў іх сем’яў паступіла 225 пагрозаў і 382 абразы. МУС адрэагавала на гэта 332 крымінальнымі справамі, да адміністрацыйнай адказнасьці прыцягнулі 127 чалавек.

Ініцыятыва BYPOL, якая складаецца пераважна з былых сілавікоў, якія сышлі з органаў унутраных справаў на знак нязгоды з рэпрэсіўнай палітыкай Лукашэнкі, паставіла сабе задачу выявіць усіх датычных да забойстваў, катаваньняў і іншага перасьледу мірных пратэстоўцаў у Беларусі.