Пра сьмерць Леаніда Заікі сябрам і калегам эканаміста паведаміў ягоны зяць Вячаслаў. Раней у Леаніда Заікі памерла жонка, круглым сіратою застаўся іх непаўналетні сын.
«А 4-й раніцы ў яго спынілася сэрца, мэдыкі забралі цела. Ён хварэў з красавіка, нікуды не выходзіў з дому, перанёс канаравірус, але адчуваў сябе па-рознаму. Яшчэ ў панядзелак мы праграму зь ім запісвалі, трымаўся ён добра, але вось сэрца ня вытрымала», — сказаў Свабодзе калега Заікі Яраслаў Раманчук.
Леанід Заіка нарадзіўся 23 жніўня 1948 году ў Горадні. Выкладаў ва ўнівэрсытэтах Беларусі. На пачатку 90-х займаў пасады загадчыка катэдры, прарэктара Нацыянальнага інстытуту гуманітарных навук, дэкана эканамічнага факультэту ЭГУ. З 1992 году кіраваў праектамі Сусьветнага Банку ў макраэканамічнай палітыцы ў Беларусі.
Як незалежны экспэрт з 1996 да 1999 году быў сябрам Рады па эканамічным разьвіцьці Савету міністраў, з 2000 да 2002 году — сябрам Экспэртнай рады Савету Рэспублікі.
З 1997 году кіраваў аналітычным цэнтрам «Стратэгія». Аўтар і навуковы рэдактар кніг і публікацый у Беларусі і за мяжою. Леанід Заіка рэгулярна выступаў з камэнтарамі на Радыё Свабода.
ГЛЯДЗІЦЕ ТАКСАМА: Эканаміст Леанід Заіка: «Актыў» Лукашэнкі адчувае, што ўсё скончылася ГЛЯДЗІЦЕ ТАКСАМА: «Вельмі дарагі прэзыдэнт, даражэй не бывае», — эканаміст пра абвал беларускага рубля і ролю IT-сэктару ГЛЯДЗІЦЕ ТАКСАМА: Леанід Заіка: «Рост цаны на нафту — гэта праклён для Беларусі» ГЛЯДЗІЦЕ ТАКСАМА: Лукашэнка: «Нафтан» ледзь зводзіць канцы з канцамі