Матэрыялы на 10 фігурантаў «карагоднай справы» ў Берасьці перадалі пракурору

Управа Сьледчага камітэту па Берасьцейскай вобласьці ўстанавіла некалькі асобаў, якія сталі фігурантамі крымінальнай справы аб групавых дзеяньнях, якія груба парушаюць грамадзкі парадак.

Паводле сьледзтва, днём 13 верасьня асобы, якія ўдзельнічалі ў несанкцыянаваным масавым мерапрыемстве ў цэнтры Берасьця, а менавіта на скрыжаваньні праспэкту Машэрава і бульвараў Касманаўтаў і Шаўчэнкі «груба парушалі грамадзкі парадак, перашкаджалі руху транспартных сродкаў на ўказаным участку і нармальнаму функцыянаваньню прадпрыемстваў і арганізацый».

Сьледчыя мяркуюць, што праз дзеяньні падазраваных перабоі ў транспартным руху назіраліся з 16.20 да 17.45, пацярпелі як асабістыя аўтамабілі грамадзян, так і тралейбусы. Агульны прастой усіх транспартных сродкаў тралейбуснага парку склаў больш за 29 гадзін. У аўтобусным руху «былі сарваныя 2 рэйсы, агульны прастой звыш 5 гадзін і ня выканана больш за 26 км прабегу».

Акрамя таго, сьледчыя вызначылі, што на розны час пратэстоўцы сваімі дзеяньнямі скарацілі працу трох гандлёвых шапікаў, а праца аднаго з рэстаранаў была перапынена больш чым на паўгадзіны.

У дачыненьні да 10 абвінавачаных крымінальную перавялі ў асобную вытворчасьць і перадалі пракурору для накіраваньня ў суд. Людзей вінавацяць па ч.1 арт.342 Крымінальнага кодэксу Беларусі «Актыўны ўдзел у групавых дзеяньнях, якія груба парушаюць грамадзкі парадак, што пацягнула парушэньне працы транспарту, прадпрыемстваў і арганізацый». Падазраваным пагражае пазбаўленьне волі на тэрмін да 3 гадоў. Адзін з абвінавачаных зьмешчаны пад хатні арышт, астатнія знаходзяцца пад падпіскай аб нявыезьдзе.

Крымінальная вытворчасьць па справе, таксама заведзенай за падзеі 13 верасьня, працягваецца супарць яшчэ 9 грамадзянаў, а 37 чалавек знаходзяцца ў статусе падазраваных.

13 верасьня ў Берасьці для разгону пратэстоўцаў сілавікі прымянілі вадамёт, хаця паводле праваабаронцы Ўладзімера Вялічкіна, не было ніякіх падставаў яго выкарыстоўваць, паколькі берасьцейцы пратэставалі мірна і нічога не разьбівалі.

Па гэтай справе праходзіць 25-гадовая настаўніца ангельскай мовы Марына Глазава. Яе арыштавалі 25 верасьня, а пазьней перавялі пад хатні арышт. Праваабаронцы прызналі Глазаву палітзьняволенай. Усяго з Беларусі на дадзены момант 158 палітвязьняў.