У Злучаных Штатах Амэрыкі зафіксавалі хвалю гвалту. Падчас выходных з нагоды Дня Незалежнасьці ЗША ў розных гарадах застрэлілі больш за 20 чалавек.
Цягам 4 і 5 ліпеня ў Чыкага атрымалі раненьні сама меней 77 чалавекі, 14 зь іх загінулі, піша Chicago Sun Times. У Нью-Ёрку ў перастрэлках у нядзелю паранілі ня менш за 41 чалавека, восем чалавек забілі, піша ABC7.
Успышка гвалту ў Нью-Ёрку і Чыкага прыцягнула ўвагу прэзыдэнта ЗША Дональда Трампа. Ён заклікаў Дэмакратычную партыю ўстанавіць «закон і парадак» у гарадах, дзе яна знаходзіцца ва ўладзе.
Chicago and New York City crime numbers are way up. 67 people shot in Chicago, 13 killed. Shootings up significantly in NYC where people are demanding that @NYGovCuomo & @NYCMayor act now. Federal Government ready, willing and able to help, if asked!
— Donald J. Trump (@realDonaldTrump) July 5, 2020
Вядома таксама, што 20 чалавек паранілі і траіх забілі ў Атланце. Сама меней 20 параненых і трое забітых у Кліўлэндзе. Падчас страляніны ў начным клюбе ў Паўднёвай Караліне загінулі два чалавекі, яшчэ восем — параненыя.
Акрамя таго, 12 чалавек паранілі падчас сямі не зьвязаных паміж сабой інцыдэнтаў у Мілўокі, яшчэ восем чалавек пацярпелі падчас шасьці інцыдэнтаў у Омазе.
Пакуль няма пацьверджаньня, што гвалт на выходных непасрэдна зьвязаны з пратэстамі, якія ўзьніклі з прычыны гібелі афраамэрыканца Джорджа Флойда пры затрыманьні паліцыяй у траўні.
У той жа час гэта адбываецца на фоне рашэньня скараціць бюджэт шэрагу паліцэйскіх дэпартамэнтаў на патрабаваньне пратэстоўцаў і мясцовых заканадаўцаў, у прыватнасьці ў Нью-Ёрку.
Паліцэйскія падраздзяленьні і шэраг палітыкаў заклікалі не зьмяншаць фінансаваньне.