Лінкі ўнівэрсальнага доступу

Дональд Трамп заявіў пра пагрозу «леварадыкальнага фашызму»


Дональд Трамп выступае ў Паўднёвай Дакоце, 3 ліпеня 2020

Прэзыдэнт Дональд Трамп лічыць, што ЗША знаходзяцца «пад ударам новага крайне левага фашызму», які дэманструе «таталітарныя» паводзіны ў дачыненьні да амэрыканскіх каштоўнасьцяў і гісторыі.

Выступіўшы 3 ліпеня напярэдадні Дня незалежнасьці каля манумэнту на гары Рашмор, у штаце Паўднёвая Дакота, Трамп заявіў некалькім тысячам сваіх прыхільнікаў, што манумэнт з барэльефамі чатырох прэзыдэнтаў ЗША «ніколі не будзе апаганены».

У вялікай прамове Трамп асудзіў «азлобленыя натоўпы, якія разбураюць помнікі і ўзьнімаюць хвалю гвалтоўных злачынстваў у гарадах».

Рэзкія словы прэзыдэнта прагучалі ўсьлед за пратэстнымі акцыямі супраць расізму і няроўнасьці, якія працягваліся некалькі тыдняў. Дэманстрацыі пачаліся пасьля таго, як 25 траўня паліцыянты ў Мінэапалісе забілі афраамэрыканца Джорджа Флойда.

Некаторыя акцыі перарасталі ў гвалтоўныя дзеяньні, пагромы, а таксама ў апаганьваньне або разбурэньне помнікаў дзеячам Канфэдэрацыі, якія падчас Грамадзянскай вайны адстойвалі інтарэсы амэрыканскага Поўдня, дзе практыкавалася рабаўладаньне. Асобныя актывісты заклікалі да ліквідацыі сымбаляў расізму, уключаючы выявы некалькіх бацькоў-заснавальнікаў ЗША, вядомых сваёй прыхільнасьцю інстытуту рабаўладаньня.

Дональд Трамп папярэдзіў, што «леварадыкальная культурная рэвалюцыя» скіраваная на зрынаньне каштоўнасьцяў Амэрыканскай рэвалюцыі, на выхаваньне дзяцей на ілжывых прыкладах і на зьнішчэньне нацыянальных і гістарычных каштоўнасьцяў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG