Каб не яна, дык «хоць заўтра» можна было бы падпісаць пагадненьне, ад якога шэнгенскія візы патаньнелі б да 35 эўра. Што за краіна, міністар не сказаў.
Міністар замежных справаў Беларусі Ўладзімер Макей расказаў БелТА аб выніках сустрэчы з Аляксандрам Лукашэнкам і згадаў аб гатоўнасьці краіны падпісаць дакумэнты аб прыярытэтах партнэрства з Эўрапейскім зьвязам, аб спрашчэньні візавых працэдураў і аб рэадмісіі.
ГЛЯДЗІЦЕ ТАКСАМА: Ад АДКБ да NATO: Лукашэнка выказаў сваё стаўленьне да міжнародных арганізацый«Мы бачым магчымасьць хуткага завяршэньня працы над гэтымі дакумэнтамі, але нашы партнэры таксама павінны трошкі паварушыцца ў гэтым пляне і праявіць гатоўнасьць да іх падпісаньня, — заявіў Макей. — Гэтыя дакумэнты, з нашага пункту гледжаньня, можна было б падпісаць хоць заўтра.
Але, на жаль, так атрымліваецца, што праз пазыцыю адной краіны Эўрасаюз становіцца закладнікам палітыкі гэтай краіны. Таму што адна краіна пераносіць нейкія праблемныя нюансы ў двухбаковых стасункаў на ўсю палітыку Эўразьвязу».
Калі Беларусь падпіша гэтыя пагадненьні, то шэнгенскія візы для яе грамадзян патаньнеюць да 35 эўра.
ГЛЯДЗІЦЕ ТАКСАМА: Шэнгенскія візы даражэюць на 20 эўра. І для беларусаў таксама?Пра «адну краіну», якая супраць пагадненьня зь Беларусьсю, казаў таксама прэс-сакратар МЗС у сьнежні — і тады таксама не называлася, што гэта за краіна. Гэта можа быць як Польшча (якая сьцьвярджала, што беларускі бок не пагаджаецца на павелічэньне штату консульскіх супрацоўнікаў у амбасадах краінаў Эўразьвязу ў Беларусі), так і любая іншая з 28 дзяржаваў Эўразьвязу.
Спрашчэньне візавага рэжыму, дадаў Макей, эўрапейскія партнэры зьвязваюць з дамовай аб рэадмісіі. Беларусь чакае фінансавай кампэнсацыі за рэадмісію нелегальных мігрантаў, якія трапілі ў Эўразьвяз празь Беларусь з трэціх краінаў і чакае заключэньня дамоваў «адпаведна нацыянальным інтарэсам Беларусі». Макей дадаў, што такія дакумэнты не павінны несьці шкоду Беларусі, беларускаму грамадзтву, стабільнасьці і міру ў рэгіёне.
ГЛЯДЗІЦЕ ТАКСАМА: Макей пра шэнгенскія візы за 80 эўра: хочам кампрамісу з ЭўразьвязамМакей таксама заявіў, што цяперашняя прапанова прыярытэтаў партнэрства з Эўразьвязам да 2020 году ўтрымлівае «непрымальныя для нас на цяперашнім этапе патрабаваньні», а адказу на контрпрапановы Беларусі пакуль не паступіла.