Ужо падпісанае і праходзіць ратыфікацыю пагадненьне аб узаемнай адмене візаў паміж Беларусьсю і дзяржавай Сэнт-Кітс і Нэвіс, паведамляецца 4 лютага на афіцыйным сайце Міністэрства замежных спраў Беларусі.
Фэдэрацыя Сэнт-Кітс і Нэвіс — дзяржава ва ўсходняй частцы Карыбскага мора. Яна месьціцца на двух астравах, якія адносяцца да Малых Антыльскіх астравоў. Плошча краіны — 261 квадратны кілямэтар, насельніцтва — 50 тысяч чалавек.
Рыхтуюцца да падпісаньня дамовы:
- З Калюмбіяй — аб узаемнай адмене візаў для кароткачасовага знаходжаньня;
- З Абʼяднанымі Арабскімі Эміратамі — аб узаемнай адмене візаў;
- З Ганконгам — аб павелічэньні тэрміну знаходжаньня да 30 дзён замест 14, як цяпер.
Працягваецца праца над праектамі міжнародных дамоваў аб бязьвізавых паездках у наступныя краіны:
- Альбанію,
- Аман,
- Гандурас,
- Рэспубліку Карэю (вядомую як Паўднёвая Карэя),
- Македонію,
- Малайзію,
- Пэру,
- Сынгапур,
- Сэйшэльскія Астравы,
- Уругвай.