Стала вядома, што выкананы сьмяротны прысуд Сямёну Беражному, асуджанаму ў справе «чорных рыэлтараў» з Магілёва. Пра гэта піша праваабарончы цэнтар «Вясна» са спасылкай на сваякоў Беражнога.
ГЛЯДЗІЦЕ ТАКСАМА: Асуджаны на сьмерць «чорны рыэлтар» спыніў галадоўкуЗа што асудзілі Беражнога?
Паводле сьледзтва, чацьвёра «чорных рыэлтараў» з Магілёва цягам шасьці гадоў пераконвалі ўласьнікаў кватэр прадаваць сваё жытло, а пасьля забівалі іх. На вясковых могілках было адшукана шэсьць пахаваньняў і тры яміны, падрыхтаваныя для будучых ахвяраў. Імі станавіліся людзі, якія злоўжывалі алькаголем і мелі цяжкае матэрыяльнае становішча.
Летась Беражны сьцьвярджаў, што пасьля затрыманьня яго кожныя два дні білі на допытах малатком і нагамі, зламалі рабрыну, і патрабавалі «ўзяць усё на сябе».
Магілёўскі абласны суд 21 ліпеня 2017 году асудзіў Ігара Гершанкова і Сямёна Беражнога на сьмяротнае пакараньне, прызнаўшы іх вінаватымі:
- у забойстве 6 чалавек;
- у падрыхтоўцы забойства яшчэ траіх;
- у шэрагу іншых злачынстваў (махлярства, вымаганьне, разбой, захоўваньне наркатычных рэчываў).
Фігурантамі гэтак званай справы «чорных рыэлтараў» былі таксама:
- жонка Гершанкова Тацяна — яе асудзілі на 24 гады калёніі агульнага рэжыму з канфіскацыяй маёмасьці;
- жыхар Магілёва Барыс Калесьнікаў — атрымаў 22 гады.
Усе чацьвёра абскарджвалі вырак у Вярхоўным судзе, але той пакінуў яго ў сіле.
Сьмяротнае пакараньне ў Беларусі
- Беларусь застаецца апошняй краінай Эўропы, дзе караюць сьмерцю.
- Усяго за гады незалежнасьці ў Беларусі вынесьлі больш за 300 сьмяротных прысудаў.
- Улады Беларусі не паведамляюць пра выкананьне сьмяротных прысудаў. Пра гэта ўдаецца даведацца з паказаньняў іншых сьмяротнікаў або ад праваабаронцаў, якія кантактуюць з роднымі асуджаных.
- Эўразьвяз пэрыядычна заклікае Беларусь адмовіцца ад сьмяротнага пакараньня.
- Нягледзячы на ўсе просьбы міжнароднай супольнасьці, рэжым Лукашэнкі працягвае выносіць сьмяротныя прысуды. 19 кастрычніка 2023 вынесены чарговы зь іх — Аляксандру Таратуту са Слуцку, які забіў 3-гадовае дзіця.