«Россельхознадзор» заявіў, што выявіў канал незаконных паставак амэрыканскіх кумпячкоў з курыцы ў Расею: буйныя партыі прадукцыі ўвозілі ў краіну зь Беларусі пад відам транзыту зь Літвы ў Казахстан, піша Interfax.by. Інфармацыі пра гэта на сайце «Россельхознадзору» на момант публікацыі няма.
Прадукцыю рэалізоўвалі ў Омскай, Новасібірскай і Арэнбургскай абласьцях Расеі.
Паводле паведамленьня ведамства выявілі:
- парушэньні вэтэрынарна-санітарных нормаў;
- неадпаведнасьць у суправаджальных дакумэнтах;
- замену ў Літве ўвезеных з ЗША кантэйнэраў і іх паўторнае плямбаваньне.
Пастаўкі мяса птушкі з ЗША ў Расеі забаранілі ад 2014 году.
У звароце да Палаты прадстаўнікоў і народу 24 красавіка Аляксандар Лукашэнка заявіў, што Беларусь экспартуе 2/3 вырабленай прадукцыі. Агульны рынак з Расеяй ня створаны, а харчовыя войны ўжо набілі аскому. Праца тармозіцца непасьлядоўнай пазыцыяй саюзьніка, лічыць Лукашэнка.