40-гадовы Аляксандар і яго 28-гадовая сужыцелька Кацярына выпалі з 8 паверху дому, дзе жылі. Жанчына памерла адразу, мужчына — пазьней у рэанімацыі. Трагедыя адбылася на вуліцы Гагарына ў Слуцку 16 лістапада каля 21-й гадзіны.
Зь імі ў кватэры жыў бацька загінулага мужчыны. Сьведкі бачылі яго ў шокавым стане на месцы здарэньня, ён увесь час паўтараў «што ж ты нарабіў?».
Жыхары дома, зь якімі ўдалося пагутарыць карэспандэнту Свабоды, кажуць, называюць бацьку загінулага прыстойным чалавекам і дбайным гаспадаром.
На антысанітарныя паводзіны пʼянага Аляксандра некалькі разоў скардзілася яго суседка, згадвае старэйшы па падʼезьдзе Іван.
На ягоную думку, грамадзянская жонка Кацярына магла сыграць ракавую ролю ў гібелі абоіх.
«Яна часта хадзіла нападпітку. А некалькі месяцаў таму стаяла на падваконніку, а Аляксандар як быццам яе ўтрымліваў. Пра гэта я паведаміў бацьку Аляксандра, каб ён зьвярнуў увагу на магчымасьць суіцыду іх абоіх. Падалося, што ён мне не паверыў», — распавёў Іван.
Жыхар суседняга падʼездзу таксама запомніў жудасную постаць маладой жанчыны ў вакне. Ён мяркуе, што так жанчына магла рыхтавацца да самагубства.
Людзі задаюцца пытаньнем, ці выпаў Аляксандар зь ёю добраахвотна, ці спрабаваў утрымаць яе і праз гэта загінуў сам.
Слуцкі раённы адзьдзел Сьледчага камітэту праводзіць праверку здарэньня.