Праўладны Беларускі рэспубліканскі саюз моладзі запусьціў 15 чэрвеня конкурс «Сэлфі&фота з вышыванкай», перадае БелТА.
Для ўдзелу ў конкурсе трэба апублікаваць у Instagram фота з хэштэгамі #вышыванка, #селфізвышыванкай, #родныятрадыціі, #селфисвышыванкай (менавіта так — па-расейску з памылкай), #родныетрадиции, #фотоконкурс, #брсм, #молодежьбеларуси. Да ўдзелу запрашаюць ня толькі сяброў БРСМ.
Пераможцаў назавуць 2 ліпеня на «Дні вышыванкі» ў Менску. Прызы пераможцам пакуль не называюцца.
Акрамя таго, 15 чэрвеня БРСМ праводзіць акцыю «Падары немаўляці вышыванку» — раздасьць у радзільнях падарункі з нацыянальнымі арнамэнтамі.
Your browser doesn’t support HTML5
Дзяржаўны Дзень вышыванкі
Гэта ўжо другі раз, калі БРСМ ладзіць «Дзень вышыванкі» і конкурс з вышыванкамі: у 2016 годзе Савет Міністраў пастанавіў правесьці дзяржаўны «Дзень вышыванкі» пасьля таго, як некалькі акцыяў пад такой назвай правяла недзяржаўная «Арт-сядзіба».
«Арт-сядзіба» прапаноўвала БРСМ дапамогу ў правядзеньні сьвята, але прапанову адхілілі. Тады «Арт-сядзіба» вырашыла адмовіцца ад правядзеньня ўласных «Дзён вышыванкі», а праводзіць іншыя мерапрыемствы, прысьвечаныя нацыянальнай сымболіцы.
Вышыванка, БРСМ і што зьмяняецца ў Беларусі
Тым часам сябры «Маладога фронту» сабралі больш за 10 тысяч подпісаў за наданьне статусу нематэрыяльнай гісторыка-культурнай каштоўнасьці бела-чырвона-беламу сьцягу, ды Міністэрства культуры ня ведае, у чым яго каштоўнасьць. Праўладная Лібэральна-дэмакратычная партыя Беларусі выступіла з заявай за тое, каб надаць такі статус гістарычнаму сьцягу, абяцаў паўтараць на зьездах партыі лёзунг «Жыве Беларусь».