Лінкі ўнівэрсальнага доступу

«Верыць можна і ў марсіянаў»: Раманчук пра веру міністра эканомікі ў інфляцыю ў 5%


Міністар эканомікі Беларусі Ўладзімер Зіноўскі заявіў, што ўпэўнены ў магчымасьці зьнізіць інфляцыю да 5%. Тым часам Міжнародны валютны фонд прагназаваў Беларусі інфляцыю за 2017 год спачатку ў 12%, потым у 9,3%.

На чэрвень 2017 году спажывецкія цэны ўжо вырасьлі адносна ўзроўню сьнежня-2016 на 3,4%, а цэны вытворцаў прамысловай і сельскагаспадарчай прадукцыі — на 7,3% і 4,7% адпаведна. За 2016 год інфляцыя склала 11,8% (амаль як ва Ўкраіне), за 2015 — 13,5%.

Уладзімер Зіноўскі, архіўнае фота
Уладзімер Зіноўскі, архіўнае фота

Чый прагноз больш верагодны, Зіноўскага ці МВФ?

Эканаміст Яраслаў Раманчук кажа Свабодзе, што «верыць можна і ў марсіянаў», але такія прагнозы трэба абгрунтаваць нейкімі фактамі:

«Справа ў тым, што ў Беларусі сёньня інфляцыя сапраўды зьніжаецца, бо Нацыянальны банк праводзіць больш жорсткую грашовую палітыку.

Але, як паказалі розныя дасьледаваньні, тое, што мы бачым у рэальным жыцьці, не адпавядае таму кошыку тавараў і паслуг, па якім мераецца інфляцыя. Тут ёсьць розьніца не ў адзін адсоткавы пункт, яна значна большая. Людзі думаюць, што тавары ў іхнім кошыку падаражэлі на 15–20% у гадавым вымярэньні, а Міністэрства эканомікі кажа, што на 5–7%. Плюс ніхто не адмяняў права закрываць крамы і караць прадпрыемствы за тое, што яны павялічылі цэны неабгрунтавана.

Яраслаў Раманчук, архіўнае фота
Яраслаў Раманчук, архіўнае фота

Казаць пра тое, што сёньняшні паказчык інфляцыі адлюстроўвае рэчаіснасьць, нельга. Тут мы ўступаем тады ў справу веры: адзін верыць, што будзе так, другі, што іначай. А што будзе на самой справе, ніхто ня будзе ведаць дакладна, бо незалежных дасьледаваньняў і вылічэньняў інфляцыі ў Беларусі, на жаль, ніхто не праводзіць».

Лукашэнка закрывае вочы на цэнавы сабатаж, каб не паўтарыліся «дзевяностыя»

Зіноўскі, гаворачы пра ўпэўненасьць у дасягненьні нізкай інфляцыі, дадае: «Галоўнае, каб нашы прадпрыемствы і арганізацыі, якія вырабляюць прадукцыю, зьніжаючы выдаткі, не павялічвалі цану». Ці так гэта?

«Гэта асноўны генэратар інфляцыі, — кажа Раманчук пра дзяржаўныя прадпрыемствы. — У нас ніводнага году не было свабодных цэнаў, але практыка такая, што галоўны чыньнік інфляцыі — дзяржаўныя прадпрыемствы, якія падвышаюць цэны.

Нагадаю, Беларусь за апошнія 20 год уваходзіць у дзясятку краін з самай высокай інфляцыяй. Калі ў нас у эканоміцы 80% актываў у руках дзяржавы, то, безумоўна, не прадпрымальнікі — асноўны чыньнік інфляцыі, а дзяржаўныя прадпрыемствы, манапалісты, якія заўсёды знаходзяць прычыны павелічэньня цэнаў. А потым падкладваюць паперкі і кажуць: „Вось бачыце, у нас такая каньюнктура, так склалася“.

Лукашэнка кажа кожны год па некалькі разоў, што цэны трэба абгрунтаваць. Казаў пра цэны і на мэдычныя тавары, на лекі. Ну і што? Кажа-кажа, а яны растуць, як хочуць. Гэта такі цэнавы сабатаж вытворцаў і імпартэраў, на які Лукашэнка закрывае вочы.

Ён ведае, што калі будзе інакш, мы вернемся да сытуацыі канца 1990-х, калі „прыкруцілі“ цэны на сьмятану, на масла, а з паліцаў нашых крамаў зьніклі яйкі. Ніводная краіна ў сьвеце сёньня не збудавала дабрабыт на адміністрацыйным рэгуляваньні цэнаў, Беларусь у гэтым сэнсе не выключэньне».

Ваша меркаваньне

Паказаць камэнтары

XS
SM
MD
LG