Уладзімір Зяленскі звольніў Міхаіла Фёдарава з пасады міністра абароны пасьля сустрэчы з вайсковым кіраўніцтвам дзяржавы, перадае Радыё Свабодная Эўропа / Радыё Свабода.
Адбыліся значныя перастаноўкі ў Кабінэце міністраў Украіны, у выніку якіх таксама страцілі пасады прэм’ер-міністар Юлія Сьвірыдзенка і шэраг іншых міністраў.
Вярхоўная Рада 16 ліпеня мае прагаласаваць за кандыдатуру новага прэм’ер-міністра Ўкраіны Сяргея Карэцкага.
Пры гэтым прэзыдэнт Уладзімір Зяленскі, які кантралюе ўсе ключавыя кадравыя прызначэньні ва ўрадзе Карэцкага, заявіў, што Фёдараў больш ня будзе займаць пасаду міністра абароны.
У Кіеве і іншых гарадах Украіны праходзяць вулічныя пратэсты супраць звальненьня Фёдарава.
Хто такі Фёдараў
34-гадовы Міхаіл Фёдараў, маладжавы вундэркінд, службовец, які быў завадатарам лічбавай трансфармацыі ўраду і залучыў дронавыя інавацыі як важную зброю ў вайне, заявіў, што быў звольнены з пасады 15 ліпеня.
За шэсьць месяцаў яго знаходжаньня на пасадзе міністра Ўкраіна значна палепшыла сваё становішча на полі бою, шматкроць атакуючы расейскія нафтаперапрацоўчыя заводы, ствараючы дэфіцыт паліва ў Расеі й ставячы прэзыдэнта Ўладзіміра Пуціна ў цяжкое становішча.
У разьвітальным допісе ў сацыяльных сетках Фёдараў адзначыў некалькі сваіх захадаў на пасадзе міністра, у тым ліку блякаваньне доступу расейскіх войскаў да спадарожнікаў Starlink, што «рэзка зьнізіла іх здольнасьць весьці эфэктыўную вайну з дапамогай бесьпілётнікаў».
Ён дадаў, што будзе працягваць працаваць, каб «перамагчы ворага з дапамогай асымэтрыі, хуткасьці інавацыяў і сілы арганізацыі».
Фёдарава прызначылі першым міністрам лічбавай трансфармацыі Ўкраіны ў 2019 годзе. На гэтай пасадзе ён праводзіў мадэрнізацыю нязграбных дзяржаўных службаў ураду, многія зь якіх існуюць яшчэ з савецкіх часоў.
Не менш важным было забесьпячэньне празрыстасьці закарэлых бюракратычных працэсаў, што дапамагло часткова выкараніць глыбока ўкаранёныя карупцыйныя практыкі.
Рэформы пад умоўнай назвай «дзяржава ў смартфоне» былі станоўча ўспрынятыя ўкраінцамі, а папулярнасьць і посьпех Фёдарава прывялі да яго павышэньня ў Кабінэце міністраў да пасады віцэ-прэм’ера. У студзені 2026 году Фёдараў быў прызначаны на пасаду міністра абароны.
Нягледзячы на брак у яго вайсковай адукацыі, што выклікала пэўныя нараканьні ўва Ўзброеных сілах Украіны, прызначэньне Фёдарава прывяло да ўсплёску выкарыстаньня і вытворчасьці дронаў — галіне ваенных інавацыяў, у якой Украіна дасягнула посьпеху. Апошнімі тыднямі Ўкраіна выкарыстоўвала бесьпілётнікі для ўдараў па шматлікіх цэлях у глыбіні тэрыторыі Расеі.
За што яго звольнілі
Украінскія мэдыя раней ужо пісалі, што Фёдарава могуць звольніць, бо ён знаходзіцца ў «сыстэмным канфлікце» зь іншымі чальцамі Кабінэту міністраў, якія ўдзельнічаюць у разьмеркаваньні выдаткаў на абарону.
Выданьне «Українська правда» (УП) піша аб працяглым канфлікце Міхаіла Фёдарава і галоўнакамандуючага Аляксандра Сырскага.
Паводле суразмоўцаў УП, прэзыдэнт растлумачыў, што больш ня можа мірыцца з пастаянным канфліктам паміж міністрам абароны і галоўнакамандуючым Аляксандрам Сырскім, — перадае сайт словы аднаго з дэпутатаў парлямэнту.
«Яны жывуць у двух розных сьветах. Міхаіл хоча ўсё алічбаваць, пабудаваць сыстэму вакол тэхналёгіяў. Вайскоўцы проста хочуць быць пачутымі. Яны просяць набыць пэўны тып зброі, але ён адмаўляецца і фінансуе іншыя сфэры. Яны проста перасталі чуць адно аднаго», — пераказвае словы прэзыдэнта Зяленскага дэпутат.
Дэн Райс, прэзыдэнт Амэрыканскага ўнівэрсытэту ў Кіеве і былы спэцыяльны дарадца галоўнакамандуючага ўзброенымі сіламі Ўкраіны, заявіў Радыё Свабодная Эўропа / Радыё Свабода, што Фёдарава могуць перавесьці на іншую высокую пасаду, у тым ліку, магчыма, на пасаду амбасадара Ўкраіны ў Злучаных Штатах.
«Я думаю, што ён зрабіў выбітную працу за вельмі кароткі прамежак часу. У яго ёсьць шанец вельмі дапамагчы адносінам паміж Украінай і ЗША. Але час пакажа, чаго хоча прэзыдэнт Зяленскі», — сказаў Райс пра Фёдарава.
Перастаноўкі ва ўрадзе падчас вайны
Зяленскі абвясьціў аб пачатку перастановак ва ўрадзе 12 ліпеня, заявіўшы, што зьмены патрэбныя для рэалізацыі абноўленай палітычнай стратэгіі.
Ён сказаў, што перастаноўка таксама мае на мэце абнавіць склад Кабінэту міністраў і што адказнасьць за ключавыя сфэры вонкавай палітыкі будзе ўскладзеная на службоўцаў з адпаведным досьведам.
