Лінкі ўнівэрсальнага доступу

Найперш — нэўтральнасьць. У Кіеве адрэагавалі на прапанову Макея аб міратворцах


Ірына Герашчанка, архіўнае фота

Першая намесьніца кіраўніка Вярхоўнай Рады Ўкраіны Ірына Герашчанка заявіла, што перш чым прапанаваць свой удзел у міратворчай місіі на Данбасе, Беларусь мусіць прадэманстраваць сапраўдную нэўтральную пазыцыю ў расейска-украінскім канфлікце.

«Згодна з украінскім заканадаўствам, запыт на міратворчую місію мусіць даць украінскі парлямэнт. Я хачу адразу сказаць: мы ня будзем мець падтрымкі дэпутатаў, калі ў мандаце місіі ня будзе выпісаная ключавая пазыцыя — там ня можа быць расейцаў, бо яны прадстаўляюць краіну-агрэсарку, і сёньня яны на Данбасе, але зь перашытымі шаўронамі, ваююць супраць Украіны. Прадстаўнікі ўсіх іншых краін — сяброўскіх, суседніх, вядома, могуць быць у міратворчай місіі. Але тут вельмі важна, якім будзе фармат місіі. Таксама мы будзем яшчэ і яшчэ раз апэляваць, у тым ліку да Беларусі, што нэўтральнасьць — гэта нэўтральнасьць, а не пазыцыя „жыць паводле маскоўскага часу“», — заявіла Ірына Герашчанка сёньня журналістам, камэнтуючы прапанову кіраўніка МЗС Беларусі.

Паводле яе, Украіна будзе весьці перамовы з краінамі-саюзьнікамі, каб не дапусьціць стварэньня місіі паводле «гібрыднай прапановы Расеі».

«Міратворчая місія ня можа ахоўваць іншую місію — місію АБСЭ, або стаяць на лініі сутыкненьняў, бо галоўная праблема ня там. Міратворчая місія павінна працаваць на ўсёй акупаванай тэрыторыі аж да расейскае мяжы», — падкрэсьліла віцэ-сьпікер Вярхоўнай Рады.

Іван Віньнік
Іван Віньнік

У той жа час іншы дэпутат — Іван Віньнік з Блёку Пятра Парашэнкі — бачыць прапанову Беларусі непрымальнаю.

«Вярхоўная Рада стварае праўныя падставы, каб вызначыць, чым міратворцы займаюцца. Міратворцы павінны быць саюзьнікамі ўкраінскага войска, быць на ўкраінскім баку ў пытаньні вызваленьня тэрыторыяў ад расейскага агрэсара. Відавочна, што міратворцы ня могуць быць расейцамі. У той жа час, на маю думку, пасьля сытуацыі з Паўлам Грыбам Беларусь вельмі сур’ёзна скампрамэтавала сябе як партнэр ці саюзьнік Украіны, бо яна непасрэдна спрыяла яго затрыманьню, выкраданьню і перадачы яго Расеі», — сказаў дэпутат журналістам.

Раман Бясьсьмертны: затрыманьне Паўла Грыба — сумесная спэцапэрацыя Беларусі і Расеі

Іван Віньнік дадаў, што пытаньне складу міратворчага кантынгенту ёсьць паўнамоцтвам ААН. «Менавіта там будзе вырашацца гэтае пытаньне, і яны будуць уключаць альбо не ўключаць краіны, і там будзе разглядацца прапанова Беларусі», — адзначыў Іван Віньнік.

Сьцяпан Палтарак
Сьцяпан Палтарак

Міністар абароны Ўкраіны Сьцяпан Палтарак перакананы, што на гэтым этапе заўчасна абмяркоўваць склад міратворчай місіі.

«Весьці размову пра тое, хто яе ўзначаліць, выступіць арганізатарам або будзе ўдзельнічаць, — пакуль рана. Цяпер трэба прыняць прынцыповае рашэньне аб разгортваньні гэтай місіі», — цытуе міністра прэсавая служба Міністэрства абароны Ўкраіны.

Сытуацыя ў зоне баявых дзеяньняў на Данбасе, 16 лістапада 2017 году
Сытуацыя ў зоне баявых дзеяньняў на Данбасе, 16 лістапада 2017 году

Напярэдадні кіраўнік МЗС Беларусі Ўладзімер Макей заявіў, што Менск гатовы ў выпадку неабходнасьці накіраваць сваіх міратворцаў на Данбас, «калі гэта будзе прымальна для ўсіх зацікаўленых краінаў, для таго каб удзельнічаць у вырашэньні міратворчых задачаў».

Ваша меркаваньне

Паказаць камэнтары

XS
SM
MD
LG