Выбары старшыні прайшлі на безальтэрнатыўнай аснове, за Андрэя Бастунца прагаласавалі 74 з 75 дэлегатаў зьезду, адзін устрымаўся. А вось на пасады чатырох намесьнікаў старшыні было вылучана 8 прэтэндэнтаў. Перамаглі па выніках рэйтынгавага галасаваньня Аляксандар Старыкевіч, Аліна Суравец, Алег Агееў, Барыс Гарэцкі.
20 красавіка ў Менску прайшоў Х зьезд грамадзкага аб‘яднаньня «Беларуская асацыяцыя журналістаў».
Традыцыйнай справаздачы старшыні БАЖу не было. Выступілі куратары асноўных кірункаў працы БАЖ.
Юрыст Алег Агееў распавёў пра адстойваньне свабоды думкі і права на атрыманьне інфармацыі. Юрась Карманаў — пра адукацыйныя праграмы БАЖ, Аліна Суравец — пра дзейнасьць у рэгіёнах, Анатоль Гуляеў — працу камісіі па этыцы. У спрэчках выступілі паўтара дзясятка сябраў арганізацыі.
Дэлегаты зацьвердзілі стратэгію разьвіцьця аб‘яднаньня на 2018–2021 гады, прынялі іншыя дакумэнты і заявы.
Падчас абмеркаваньня зьменаў у Кодэкс журналісцкай этыкі большасьць дэлегатаў прагаласавалі за тое, каб Камісія па этыцы ў новым складзе распрацавала палажэньні кодэксу больш дэталёва. Такім чынам, папраўкі ў Кодэкс журналісцкай этыкі прынятыя не былі.
Пры вылучэньні кандыдатур на пасаду старшыні Жанна Літвіна, якая ачольвала БАЖ цягам 20 гадоў, нагадала, што Андрэй Бастунец кіруе арганізацыяй толькі адзін тэрмін — 3 гады, а ў краіне бязьзьменнай улады гэта зусім мала. Урэшце Бастунца абралі старшынём БАЖу яшчэ на 3 гады.
Беларуская асацыяцыя журналістаў была створана ўвосень 1995 году. Колькасьць сябраў на сёньняшні дзень — 1238. Цягам 20 гадоў — з 1995 па 2015 год — БАЖам кіравала Жанна Літвіна. На ІХ зьезьдзе 25 красавіка 2015 году старшынём грамадзкага аб’яднаньня быў абраны Андрэй Бастунец, 20 красавіка 2018 году яго пераабралі на другі тэрмін.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў