Старшыня прэзыдыюму Нацыянальнай акадэміі навук Беларусі Ўладзімер Гусакоў сказаў, што навукоўцам НАН толькі сьціпласьць не дае атрымаць Нобэлеўскую прэмію, перадае БелаПАН.
«Чаму да гэтага часу ў нас не было нобэлеўскіх ляўрэатаў, — казаў Гусакоў, — дык гэта празь сьціпласьць беларусаў, а не таму, што ў нас няма працаў аналягічных і раўназначных. Калі мы аналізуем працы, якія прайшлі, то бачым, што ў нас ёсьць значна лепшыя і мацнейшыя».
Гусакоў заявіў, што цяпер навукоўцам НАН ставіцца задача «адкінуць лішнюю сьціпласьць» і вылучацца на Нобэлеўскую прэмію «нароўні з прэтэндэнтамі зь іншых краінаў».
Пакуль Нобэлеўскай прэміяй уганаравалі толькі аднаго грамадзяніна Беларусі — Сьвятлана Алексіевіч атрымала Нобэлеўскую прэмію па літаратуры ў 2015 годзе. Але ў 2000 годзе Нобэлеўскую прэмію па фізыцы атрымаў народжаны ў Віцебску грамадзянін Расеі Жарэс Алфёраў; у 1994-м Нобэлеўскую прэмію міру атрымаў былы кіраўнік Ізраіля Шымон Пэрэс, якога ў вёсцы Вішнева Менскай вобласьці ведалі як Сямёна Пэрскага; у Пінскай гарадзкой рэальнай вучэльні навучаліся ляўрэаты Нобэлеўскай прэміі міру 1978 году Мэнахем Бэгін і Нобэлеўскай прэміі па эканоміцы 1971 году Сайман Кузьнец...
Гусакоў дадаў, што навукоўцы НАН працуюць над палепшаным прататыпам электрамабіля на базе Geely SC7, які «будзе запатрабаваны і праз 3–5 год», і над супэркандэнсатарам, які дазволіць электрамабілю праяжджаць на адным зарадзе 1000 км (а ня 100 км, як першапачаткова анансаваны беларускі электрамабіль, і ўдвая больш за самую ёмістую Tesla).
