Лінкі ўнівэрсальнага доступу

Паўло Грыб будзе заставацца пад арыштам мінімум да сярэдзіны кастрычніка


Паўло Грыб

Праваахоўныя органы арыштавалі Паўла Грыба, грамадзяніна Ўкраіны, да 17 кастрычніка. Пра гэта расейскаму агенцтву ТАСС паведамілі ў Кастрычніцкім раённым судзе Краснадару.

«Мера стрыманьня — арышт на два месяцы. Рашэньне вынесена 17 жніўня», — паведамілі ў судзе, адзначыўшы, што гаворка пра «абвінавачанага Грыба Паўла Ігаравіча, 1998 году нараджэньня, які знаходзіцца ў міжнародным вышуку». Раней адвакат арыштаванага Андрэй Сабінін паведаміў ТАСС, што маладога чалавека ўтрымліваюць у Краснадары ў СІЗА-5 Фэдэральнай службы выкананьня пакараньняў. Грыба абвінавачваюць паводле артыкулу 205.1 КК РФ («Садзейнічаньне тэрарыстычнай дзейнасьці»).

У канцы жніўня былы супрацоўнік Дзяржаўнай памежнай службы Ўкраіны Ігар Грыб заявіў, што расейскія спэцслужбы выкралі ягонага сына Паўла падчас наведваньня Беларусі. Амбасада Ўкраіны ў Менску накіравала ноту ў МЗС Беларусі з мэтай высьвятленьня месцазнаходжаньня Грыба-малодшага.

У Міністэрстве ўнутраных спраў Беларусі паведамілі, што такі грамадзянін Украіны іхнымі супрацоўнікамі не затрымліваўся, а таксама не зьвяртаўся ў міліцыю. Неўзабаве пракуратура Чарнігаўскай вобласьці распачала крымінальную справу паводле артыкулу «Наўмыснае забойства».

Міністэрства замежных спраў Украіны выказала пратэст Расеі ў сувязі з затрыманьнем Паўла Грыба. Ведамства запатрабавала забясьпечыць доступ ўкраінскіх консулаў да затрыманага, даць вычарпальную інфармацыю пра месца, прычыны і абставіны яго затрыманьня і забясьпечыць неадкладнае вяртаньне грамадзяніна Ўкраіны на радзіму.

Ваша меркаваньне

Паказаць камэнтары

XS
SM
MD
LG