Лінкі ўнівэрсальнага доступу

Генпракурор пра затрыманьні 15 сакавіка: «Калі будуць падставы, правядзем праверку». Відэа падстаў


Суд над удзельнікамі акцыі недармаедаў у Менску 16 сакавіка 2017 году. На фота — Андрэй Навакоўскі, якога абвінавачваюць у нібы распыленьні газу падчас затрыманьня

Генэральны пракурор Беларусі Аляксандар Канюк заявіў журналістам, што пасьля «Маршу недармаедаў» 15 сакавіка не паступала заяў у пракуратуру пра гвалтоўныя затрыманьні, а камэнтаваць затрыманьні, «грунтуючыся выключна на паведамленьнях СМІ», ён ня будзе, перадае Naviny.by.

«Калі будуць падставы, калі будзе заява, то Генпракуратура правядзе праверку», — сказаў Канюк і дадаў, што трэба выслухаць і «другі бок».

За акцыю 15 сакавіка ў Менску пасадзілі больш за тры дзясяткі чалавекі, таксама суды за акцыі праходзілі ў іншых гарадах. Шмат людзей было затрымана на прыпынку каля «Белай вежы»: там «людзі ў цывільным» гвалтам выцягвалі людзей з тралейбуса, падазраючы, што яны анархісты, якія хавалі твары пад маскамі падчас шэсьця.

Некаторыя затрыманыя сьцьвярджалі, што наогул ня бралі ўдзелу ў акцыі, іншыя — што не насілі масак і маюць відэадоказы гэтага. Сьведкі-міліцыянты не заўсёды маглі апісаць дэталі затрыманьня — напрыклад, апісаць маску затрыманага. Таксама гвалтоўныя затрыманьні праводзіліся перад маршам у Менску, пасьля маршу ў Магілёве.

Відэа затрыманьняў 15 сакавіка. Асьцярожна, шмат лаянкі ў першым відэа!

«Затрыманьне праводзілася ў грамадзкім транспарце, бо была верагоднасьць таго, што правапарушальнікі могуць схавацца, — тлумачыў прадстаўнік МУС Георгі Яўчар. — У час затрыманьня грамадзяне аказалі супраціў, адзін супрацоўнік міліцыі атрымаў траўмы і цяпер знаходзіцца на лячэньні ў шпіталі».

Усяго з пачатку сакавіка за «Маршы недармаедаў» пасадзілі пад арышт, аштрафавалі ці выклікалі ў суд каля 200 чалавек.

Чаму рэпрэсіі супраць удзельнікаў акцыяў пратэсту становяцца ўсё больш брутальнымі?

Ваша меркаваньне

Паказаць камэнтары

XS
SM
MD
LG