Раённы суд у расейскім Екацярынбургу адхіліў хадайніцтва аб арышце падазраванага ў спробе падпалу помніка першаму прэзыдэнту Расеі Барысу Ельцыну, перадае ТАСС са спасылкай на прэс-службу суду.
У спробе падпаліць помнік падазраюць Ігара Шчуку — актывіста Нацыянал-бальшавісцкай партыі родам з Салігорску, які называў сябе палявым камандзірам прарасейскіх баевікоў на Данбасе. За вандалізм з палітычных матываў яму пагражае да трох гадоў турмы.
Ад дзеяньняў вандала манумэнт не пацярпеў, ахова «апэратыўна спыніла проціпраўныя дзеяньні», а паліцыя хутка затрымала падазраванага. Пра яго паведамляецца, што ён аказаўся «прыежджым беспрацоўным», раней судзімым за распальваньне варожасьці і абразу прадстаўніка ўлады.
