Лінкі ўнівэрсальнага доступу

Лукашэнка звольніў кіраўніка Крычаўскага раёну. Яго адстаўкі патрабавалі больш за 400 чалавек


Васіль Сысоеў

Старшыня Крычаўскага райвыканкаму Васіль Сысоеў, за адстаўку якога было сабрана больш за 400 подпісаў, зьняты з пасады. Аляксандар Лукашэнка прызначыў кіраваць раёнам першага намесьніка Сысоева — Дзьмітрыя Бачкова. Гэты чыноўнік адказваў за мясцовую эканоміку і прадпрымальніцкую галіну.

У ідэале кіраўніка раёну мае выбіраць насельніцтва

Ініцыятары кампаніі за адстаўку Сысоева не выключаюць, што чыноўніка зьнялі з пасады ў тым ліку і праз намаганьні грамадзкасьці. Незадаволеныя грамадзяне даводзілі: Сысоеў не дае рады сваім абавязкам. За час ягонага кіраўніцтва раёнам стан мясцовай эканомікі і сацыяльнай сфэры пачаў «пагаршацца імклівымі тэмпамі».

«Адстаўка Сысоева — гэта сыгнал, што грамадзкасьць можа ўплываць на кадравыя рашэньні кіраўніка дзяржавы праз збор подпісаў і крытычныя публікацыі ў недзяржаўнай прэсе», — казаў у інтэрвію Свабодзе адзін з ініцыятараў кампаніі за адстаўку чыноўніка, журналіст Сяргей Няроўны.

«У ідэале, — адзначаў ён — кіраўніка раёну мусяць выбіраць яго жыхары, каб чыноўнік адчуваў адказнасьць перад імі. Аднаку у цяперашніх умовах даводзіцца спадзявацца на ўпартасьць і актыўнасьць незапалоханай часткі грамадзтва».

Лукашэнка паказаў, хто прымае кадравыя пытаньні

Сяргей Няроўны заўважыў, што хуткай рэакцыі на незадаволенасьць насельніцтвам дзейнасьцю чыноўніка не чакалася. Зьбіраць подпісы за адстаўку Сысоева пачалі сёлета ў лютым. Прэзыдыюм раённага савету і кіраўніцтва Магілёўскага аблвыканкаму не падтрымалі ініцыятывы грамадзян.

«У Менску, вядома ж, адсочвалі, што адбываецца са зьбіраньнем подпісаў у Крычаве, — мяркуе Няроўны. — Зразумела, ані дэпутаты райсавету, ані чыноўнікі з аблвыканкаму не вырашаюць такіх кадравых пытаньняў. Лукашэнка паказаў, хто прымае канчатковыя рашэньні. Кіраўнік дзяржавы атрымліваў зьвесткі з розных крыніцаў».

Паводле журналіста, некаторым з падпісантаў тэлефанавалі нібыта зь дзяржаўнай сацыялягічнай службы і пыталіся пра стаўленьне да мясцовай улады. Як ён кажа, людзі не хавалі, што даверу да чынавенства ня маюць і спадзяюцца на Лукашэнку. За адстаўку Сысоева падпісаліся 418 жыхароў раёну.

Лукашэнку разгойдваць стабільную сытуацыю ў раёне можна

Падчас разгляду звароту за адстаўку Сысоева прэзыдыюм раённага савету вінаваціў ініцыятараў кампаніі ў тым, што яны «намагаюцца разгайдаць стабільную сытуацыю ў раёне». Настойвалі, што подпісы зьбіралі падманам. Людзям, паводле чальцоў прэзыдыюму, нібыта казалі, што подпісы зьбіраюцца не за адстаўку старшыні райвыканкаму, а за вырашэньне сацыяльных праблемаў.

У лісьце з аблвыканкаму ацэнкі дзейнасьці Васіля Сысоева на пасадзе кіраўніка раёну няма. Адзначаецца, што кіраўніцтва раёну робіць захады, каб ліквідаваць нэгатыўныя тэндэнцыі 2016 году. Яны, гаворыцца ў дакумэнце, дазволілі раёну ўзьняцца «у рэйтынгу сацыяльна-эканамічнага разьвіцьця рэгіёнаў Магілёўскай вобласьці з 20-га на 14-е месца».

Пагутарыць з новым кіраўніком раёну Дзьмітрыем Бачковым не ўдалося. Вядома, што ён 1979 году нараджэньня. Асаблівай ініцыятыўнасьцю на ранейшай пасадзе не вылучаўся. Аляксандар Лукашэнка прызначыў Бачкова старшынём выканкаму 14 верасьня.

XS
SM
MD
LG