Лінкі ўнівэрсальнага доступу

«Крычаўскі раён падае». Жыхары патрабуюць замяніць кіраўніка


Старшыня Крычаўскага райвыканкаму Васіль Сысоеў

418 жыхароў Крычаўскага раёну падпісаліся за адстаўку старшыні райвыканкаму Васіля Сысоева. На думку незадаволеных грамадзян, ён не дае рады сваім абавязкам.

Зварот накіравалі старшыні Магілёўскага аблвыканкаму Ўладзімеру Даманеўскаму і ў райсавет. Прынятае рашэньне просяць апублікаваць у абласной і раённай газэтах.

«Мы назіраем за сытуацыяй у раёне, гаварылі зь людзьмі. Усе кажуць, што раён „падае“. На пачатку году мы даведаліся пра ацэнку аблвыканкаму, і, паводле яе, раён апынуўся на перадапошнім месцы па рэйтынгу эканамічнага і сацыяльнага разьвіцьця ў вобласьці. Так што нашы ацэнкі і ацэнка аблвыканкаму супалі. Нашы высновы: трэба мяняць кіраўніка раёну», — кажа мясцовы журналіст Сяргей Няроўны.

Паводле яго, спачатку плянавалі сабраць тысячу подпісаў, ды шмат хто баяўся падпісвацца.

«Але 418 чалавек паставілі подпісы — гэта таксама дасягненьне», — кажа Няроўны.

Сяргей Няроўны
Сяргей Няроўны

«Пасьля таго як пры канцы кастрычніка 2011 году старшынём Крычаўскага райвыканкаму зацьвердзілі Васіля Сысоева, і без таго гаротны стан эканомікі і сацыяльнай сфэры нашага раёну стаў пагаршацца паскоранымі тэмпамі», — гаворыцца ў звароце, пад якім некалькі месяцаў падпісваліся крычаўцы.

Яны вінавацяць кіраўніка ў спыненьні прадпрыемстваў, на якіх трымалася эканоміка раёну: старога цэмзавода, райпо, «Крычаўгрузаўта». Паводле падпісантаў, амаль усе сельгаспрадпрыемствы ў раёне — пад пагрозай банкруцтва. Скарачаецца колькасьць камэрцыйных арганізацый і прадпрымальнікаў, а кіраўніцтва раёну ня робіць «адэкватных і эфэктыўных захадаў па пытаньнях працаўладкаваньня грамадзян».

«Крычаўскі раён стаў некамфортны для пражываньня», — гаворыцца ў звароце са спасылкай на высновы, зробленыя абласной дзяржаўнай газэтай «Магілёўскія ведамасьці».

«Усё гэта вынік неэфэктыўнай арганізацыі працы мясцовага райвыканкаму на чале з старшынём Васілём Сысоевым, — падсумоўваюць падпісанты звароту. — Лічым неабходным рашыць пытаньне аб мэтазгоднасьці далейшага знаходжаньня яго на пасадзе кіраўніка выканаўчай улады раёну ў адпаведнасьці зь дзейным заканадаўствам Рэспублікі Беларусь».

Сяргей Няроўны разьлічвае, што яго запросяць на сэсію райсавету, калі будзе разглядацца зварот. І спадзяецца, што ўлады ня будуць перасьледаваць падпісантаў.

Ваша меркаваньне

Паказаць камэнтары

XS
SM
MD
LG