Лінкі ўнівэрсальнага доступу

Як выглядае дзяржаўная мяжа Беларусі? «Калючы дрот замянілі на сетку, КСП аруць, але не паўсюль»


У Латвіі на дзяржаўным узроўні абмяркоўваюць магчымасьць усталяваць плот на мяжы зь Беларусьсю, каб абараніцца ад плыні мігрантаў з усходу.

Ідэю пабудовы плота падтрымала прэм’ер-міністар Латвіі Лаймдота Страўюма, якая спаслалася на зьвесткі пра пранікненьне з тэрыторыі Беларусі нелегалаў. «Ужо дзьве групы прыйшлі зь Беларусі. Многія эўрапейскія дзяржавы будуюць платы, і гэта можа быць магчымым рашэньнем», — лічыць спадарыня Страйюма.

Ці пацьвярджаюць у Беларусі факт пранікненьня на тэрыторыю Латвіі празь Беларусь дзьвюх вялікіх групаў мігрантаў і як тлумачаць гэтыя зьвесткі?

Прэсавы сакратар Дзяржаўнага памежнага камітэту Беларусі Аляксандар Цішчанка гэтак пракамэнтаваў зьвесткі латыскага боку пра групы мігрантаў:

«Яны выявілі на сваёй тэрыторыі дзьве групы. А як і якім чынам яны там апынуліся, нашы і латвійскія памежнікі разьбіраюцца. Папярэдне — прыкметаў парушэньня мяжы не было. Групы маглі там апынуцца па-рознаму. Па гэтым пытаньні вядзецца праца, і пакуль афіцыйных пацьвярджэньняў няма», — сказаў спадар Цішчанка карэспандэнту Свабоды.

Паводле Аляксандра Цішчанкі, беларускія памежнікі ня думаюць, што насупраць Беларусі на латвійскай тэрыторыі могуць узьнікнуць муры кшталту таго, які адгароджвае ў Ізраілі кварталы палестынцаў. «Тое, што Латвія хоча аднавіць нейкія сыстэмы ці на нейкіх напрамках усталяваць больш шчыльны кантроль, прыкладам, з датчыкамі, зь відэаназіраньнем ці з сыстэмамі памежнага загароджваньня — гэта нармальна. Гаворка ж не ідзе пра бэтонныя сьцены і гэтак далей. Гэта агульная тэндэнцыя, якая разьвіваецца на тле міграцыйнага крызісу ў Эўропе, і кожная краіна Эўразьвязу спрабуе гэтыя пытаньні вырашыць, пакуль ідзе фінансаваньне. Мяркую, што гэтак стаяць справы».

Як абсталяваная мяжа Беларусі з Латвіяй, Літвой, Польшчай, Украінай і Расеяй? Ці ёсьць у ахове гэтых межаў розьніца?

Мяжу з Латвіяй і Літвой ахоўваюць памежнікі, якія служаць у Полацкім і Лідзкім памежных атрадах, а таксама ў Смаргонскай і Гарадзенскай памежных групах. Памежнікі рэгулярна патрулююць лінію мяжы, у тым ліку праводзяць рэйды па сыгналах, якія атрымліваюць ад мясцовых жыхароў — удзел у ахове мяжы «памочнікаў» зь ліку мясцовага насельніцтва ў Беларусі застаўся з савецкіх часоў. Уздоўж мяжы зь Літвой і Латвіяй стаяць вышкі памежных заставаў, у пэўных месцах усталявана адмысловае відэа- ды іншае абсталяваньне, але сама мяжа празрыстая — плоту няма. Затое на гэтым участку беларускай мяжы, як і на ўкраінскім, зьяўляюцца ўсё новыя заставы. Прыкладам, сёлета — новая стацыянарная памежная застава ў Астравецкім раёне, каля вёскі Караняты. Летась на мяжы зь Літвой зьявіліся дзьве новыя мабільныя заставы, для іх ужо будуюць стацыянарныя пункты каля вёсак Буйкі і Жарнелі.

Памежнікі на мяжы з Украінай, архіўнае фота
Памежнікі на мяжы з Украінай, архіўнае фота

Празрыстай застаецца і мяжа Беларусі з Украінай, аднак яе ахова робіцца ўсё больш пільнай. Тут няма драцяной агароджы, але ўсе іншыя тэхнічныя складнікі фактычна ўжо такія самыя, як на мяжы зь Літвой і Латвіяй, у тым ліку КСП — кантрольна-сьледавая паласа.

«КСП у нас ужываюць і на ўчастках з Прыбалтыкай, і на ўчастках з Польшчай, і на ўчастках з Украінай. Гэтая паласа ва ўсім сьвеце і сёньня застаецца самай паказальнай рэччу, бо ў выпадку парушэньня кожны бок абавязаны прадставіць доказ парушэньня мяжы. КСП — гэта як пратакол. Толькі з Расеяй няма КСП, бо там няма сыстэмы памежнага кантролю, мы там не правяраем пашпарты. Там працуюць пэўныя сілы з Расеі, часам з нашага боку, але яны маюць больш праваахоўны бок, не такі клясычны, як, скажам, на мяжы з Эўразьвязам ці Ўкраінай. Там працуе больш апэратыўны кампанэнт. Часам мы і там затрымліваем парушальнікаў, але яны больш эканамічнага фармату», — распавёў прэсавы сакратар Дзяржаўнага памежнага камітэту Аляксандар Цішчанка.

Мяжа з Польшчай
Мяжа з Польшчай

Найлепш абсталяванай мяжой Беларусі застаецца мяжа з Польшчай, якая адзіная ў савецкія часы была дзяржаўнай і збольшага мусіла захавацца ў нязьменным выглядзе. Аднак і тут адбыліся пэўныя зьмены, паведаміў нашаму радыё жыхар памежнага Берасьця Анатоль, якому даводзілася бываць на мяжы і ў савецкія часы, і яшчэ 5 гадоў таму.

«Што ўвогуле ўяўляе сабой беларуска-польская мяжа? Дакладна па лініі мяжы з нашага боку ідзе шэраг памежных чырвона-зялёных слупоў, а з польскага — бела-чырвоных. Слупы ўсталяваныя на адлегласьці бачнасьці, таму, калі мяжа робіць паварот, дык дакладна ў пункце павароту стаяць слупы. Наступны рубеж — гэтак званая „трохсотка“. Гэта прыкладна ў 300 мэтрах уздоўж лініі мяжы пракладзеная КСП — кантрольна-сьледавая паласа шырынёй 4–5 мэтраў, на якой нічога няма, яна ўзараная і прабаранаваная. Яе рэгулярна абнаўляюць, каб быў бачны кожны сьлед. Уздоўж паласы ідзе дарога для аўтамабіля і пешаходаў. Наступны рубеж — „васьмісотка“. То бок ад першай КСП дакладна праз 800 мэтраў зноў дарога, за ёй КСП і за ёй плот з калючага дроту. Але за апошні час шмат у якіх месцах замест калючага дроту на плоце начапілі мэталічную сетку і падключылі такія ўчасткі да сыстэмы выяўленьня. То бок калі дрот на сетцы зачапіць ды парваць ці „замкнуць“, дык спрацуе сыгнал на пульце, і паедзе дзяжурная група. Але гэтак было пры саветах — калі аралі абавязкова абедзьве КСП. А цяпер не паўсюль барануюць „трохсотку“ — ня ведаю, чаму».

Мяжа з Польшчай у раёне Берасьця
Мяжа з Польшчай у раёне Берасьця

Чаму на беларуска-польскай мяжы застаецца плот з калючага дроту ці сеткі? Паводле Аляксандра Цішчанкі, да гэтага спрычыніўся і польскі бок.

«На беларуска-польскай мяжы стаіць не банальны плот, гэта так падаецца, што ён просты. Насамрэч гэта рэч значна хітрэйшая, чым была. Там стаяць і датчыкі, і сыстэма відэаназіраньня. Проста нашы польскія суседзі просяць пакуль не здымаць тыя варыянты, якія дзейнічаюць з савецкіх часоў».

Беларуска-польскую мяжу ахоўваюць памежнікі дзьвюх самых моцных памежных групаў — Гарадзенскай і Берасьцейскай чырванасьцяжнай імя Дзяржынскага. А вось мяжа з Украінай — параўнальна зусім маладая, затое яна імкліва разьвіваецца. Украінскі ўчастак мяжы ахоўваюць памежнікі Пінскага памежнага атраду і Гомельскай памежнай групы, да якіх нядаўна далучылі новы атрад.

«Там зьявіўся новы памежны атрад — Мазырскі, зьявіўся шэраг новых дадатковых застаў, памежных пастоў. Па сутнасьці, мы ўжо абсталявалі ў інжынэрным сэнсе гэты беларуска-ўкраінскі ўчастак з пункту гледжаньня комплексаў ды ўсіх іншых сыстэм. Таксама разам з украінскім бокам пачалася практычная дэмаркацыя мяжы», — паведаміў Аляксандар Цішчанка.

Прэсавы сакратар спаслаўся на службовую таямніцу і ня стаў паведамляць колькі ўсяго памежнікаў ахоўваюць беларускую мяжу. Паводле незалежных крыніцаў, на памежнай службе стаіць больш за тысячу чалавек.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG