Лінкі ўнівэрсальнага доступу

«Новы рубеж мэдыцынскага прагрэсу». У ЗША ўпершыню ўхвалілі генную тэрапію раку


Ілюстрацыйнае фота

У ЗША ўпершыню ўхвалілі і дазволілі ўжываць першую генную тэрапію ад вострага лімфабластавага лейкозу, прэпарат Kymriah (тысагенлецлеўцэл). Для кожнага хворага прэпарат будзе ўнікальным, бо ствараецца на аснове ўласных клетак імуннай сыстэмы пацыента.

«Мы ўзялі новы рубеж мэдыцынскага прагрэсу дзякуючы магчымасьці запраграмаваць уласныя клеткі пацыента, каб яны атакавалі сьмяротны рак», — сказаў Скот Готліб, кіраўнік Упраўленьня нагляду за якасьцю прадуктаў і мэдыкамэнтаў ЗША (FDA).

Курс лячэньня абыдзецца ў $ 475 000, але калі ў першы месяц лячэньня не будзе паляпшэньняў, то кампанія-вытворца, Novartis Pharmaceuticals, не запатрабуе аплаты.

Новую тэрапію плянуюць выкарыстоўваць толькі тады, калі рак не рэагуе на стандартныя мэтады лячэньня і вяртаецца, што бывае ў 15-20% выпадкаў.

Тэрапію праводзяць так: у пацыента здабываюць Т-клеткі імуннай сыстэмы, адпраўляюць на завод фармацэўтычнай кампаніі, дзе іх генэтычна мадыфікуюць — дадаюць новы ген з адмысловым бялком CAR, які дазваляе Т-клеткам распазнаваць і зьнішчаць ракавыя клеткі з асаблівым бялком CD19 на паверхні, характэрным для вострага лімфабластавага лейкозу. Затым мадыфікаваныя Т-клеткі ўводзяць пацыенту.

Новы сродак паказаў сваю эфэктыўнасьць у клінічных тэстах: у 83% тых, хто атрымалі Kymriah на працягу трох месяцаў, рак адступіў. Тэставаньне праводзілася на групе з 63 пацыентаў у розных шпіталях.

Востры лімфабластавы лейкоз — рак, які найбольш часта сустракаецца сярод дзяцей у ЗША. Ён пашкоджвае клеткі крыві і касьцявога мозгу.

Амэрыканская FDA выдала дазволы на дасьледаваньні 550 розных лекаў на аснове геннай тэрапіі.

Ваша меркаваньне

Паказаць камэнтары

XS
SM
MD
LG