ВМС Францыі 25 чэрвеня затрымалі ля берагоў Сыцыліі нафтавы танкер Deliver з расейскага «ценявога флёту».
Як паведаміў францускі прэзыдэнт Эманюэль Макрон, карабель затрымалі за парушэньне марскога права. Паводле яго, гэта новая апэрацыя «дэманструе рашучасьць эўрапейцаў» супраць «ценявога флёту» Расеі.
«Мы не дазволім „ценявы флёт“ абыходзіць санкцыі і фінансаваць ваенныя дзеяньні Расеі», — напісаў ён у сацсетцы X.
Макрон зазначыў, што Францыя будзе прыкладаць усе неабходныя намаганьні, каб «павялічыць выдаткі вайны для Расеі і садзейнічаць устанаўленьню трывалага і доўгатэрміновага міру ва Ўкраіне».
Паводле сэрвісу MarineTraffic, Deliver ходзіць пад сьцягам Камэруна. Танкер 4 чэрвеня выйшаў з расейскага порту Прыморск і 20 ліпеня павінен быў прыбыць у порт Сынгапура.
Чаму гэта важна?
Гэта ня першы танкер з расейскага «ценявога флёту», які затрымлівае Францыя.
З восені мінулага года францускія вайскоўцы сумесна з саюзьнікамі затрымлівалі танкеры Grinch, Boracay, Deyna і Tagor. Усе яны пасьля былі адпушчаныя. Танкер Grinch, як заяўлялі францускія ўлады, адпусьцілі пасьля штрафу ў «некалькі мільёнаў эўра» за няздольнасьць экіпажа абгрунтаваць выкарыстаньне сьцяга.
Пасьля затрыманьня танкера Smyrtos ў Ля-Маншы іншыя караблі «ценевага флёту» Расеі пачалі мяняць маршруты.
Такія караблі затрымлівалі таксама Вялікая Брытанія, Бэльгія, ЗША, Эстонія і іншыя краіны Захаду.
Расея выкарыстоўвае «ценевы флёт» танкераў зь непразрыстай структурай уласнасьці, каб абысьці міжнародныя санкцыі, накладзеныя на яе нафтавы экспарт.
«Ценевы флёт» складаецца больш чым з 700 вадаплаваў і адказвае за перавозку 75% расейскай нафты ў абыход санкцыяў.
